A Universidade de Santiago suspende a reunión do Consello de Goberno polo boicot de 35 persoas vinculadas ao peche en Historia

O reitor da Universidade de Santiago de Compostela (USC), Antonio López, viuse obrigado a suspender a sesión do Consello de Goberno que debía celebrarse durante a mañá deste venres no Centro de Estudos Avanzados. Fíxoo ante a «imposibilidade de que a reunión se realice con garantías democráticas e de seguridade», unha vez que 35 persoas vinculadas ao peche na Facultade de Historia impedisen, de xeito pacífico, a entrada no edificio aos membros do órgano executivo universitario. 

Ese grupo de persoas identificáronse como membros da Asemblea internacionalista do estudantado e da clase traballadora, que consideran que a USC é cómplice do exterminio de civís por manter relacións con empresas e entidades vinculadas a Israel. Desde o reitorado apuntan que foron claros coa súa postura, tanto a través dunha declaración institucional como cun manifesto do equipo de goberno. En ambos reclamaron o cesamento da ofensiva israelí e o recoñecemento do estado palestino. 

Afirman que continúan respectando o dereito á libre e pacífica manifestación, pero tras a situación desta mañá, o reitor considerou que o máis oportuno era suspender a sesión. López convocará este venres ás diferentes instancias de goberno para buscar o máximo consenso á hora de determinar cales son as decisións para tomar. Tamén se convocarán a representantes dos estudantes, cos que os acampados xa se negaron a negociar. Para o luns está prevista unha reunión con todas as partes, na que se incluirán aos decanos doutras facultades, así como ao Consello do Estudantado e ao sindicato estudantil Erguer, un dos poucos rexistrados como tal de xeito oficial. 

Non á violencia

Desde o reitorado rexeitan o uso de violencia para desaloxar o inmoble, aínda que fontes da USC cren que «xa non estamos a falar de Palestina nin da nosa comunidade universitaria, senón que nos estamos atopando cun problema de orde pública e unha okupación dun edificio público dun inmenso valor patrimonial. Obviamente, a universidade é un espazo para o diálogo e a violencia é o último recurso». Sobre o boicot desta mañá, confirman que en ningún momento houbo insultos ou agresividade, aínda que precisan que se tratou de mediar coas persoas que se atopaban na porta do Centro de Estudos Avanzados, intento que acabou sen éxito ao non haber ninguén que exercese como portavoz. 

Emitiuna Asemblea Internacionalista do estudantado e da clase traballadora por Palestina ao longo do día un comunicado para explicar a súa versión do sucedido. Afirman que enviaron á USC unha proposta do que veñen esixindo nas últimas semanas, que pretendían que se incluíse na orde do día. «O consello non só decidiu de maneira activa suspender o acto e negouse a prestar atención ás nosas demandas, senón que, ademais, evitou darnos unha resposta, a sabendo que a nosa proposta xa contaba co número de sinaturas necesarias para que esta se incluíse na orde do día». Destacan que cumpriron cos prazos e procedemento oficiais, por iso é polo que «non iamos a consentir a celebración dun consello que non atende as demandas da propia comunidade universitaria». Por iso, reiteran que a USC segue dándolle as costas á causa palestina, ao considerar que «evita continuamente facer uso dos seus organismos e competencias para loitar pola mesma».

---

---

---