Licitan a obra que corrixirá as carencias do campo de fútbol dAs Cancelas, en Santiago
SANTIAGO
O mal estado das torres de iluminación estaban a condicionar o uso do recinto no inverno
18 may 2024 . Actualizado á 05:00 h.O Concello licitou por 223.021 euros (IVE incluído) as obras que poñerán fin ás carencias da rede de iluminación que desde hai tempo arrastra o campo de fútbol dAs Cancelas. A inestabilidade das torres de iluminación está a condicionar o uso desta instalación no inverno, ata o punto de que hai que estar pendente de que se dean as condicións meteorolóxicas favorables de velocidade do vento para poder utilizala, segundo recolle o informe que deu pé á programación da intervención. Esas circunstancias fan que a actividade estea suxeita a frecuentes cancelacións de eventos deportivos nesa época do ano.
A situación obriga a substituír as catro torres de iluminación, en perigo de colapso, segundo ese informe. E iso é o que se fará con este contrato, aínda que se aproveitará para introducir proxectores de tecnoloxía led e afrontar tamén outras melloras, como a instalación dun marcador electrónico e de megafonía (servizos ambos dos que carece agora mesmo o campo), así como a dotación de medidas de control de eficiencia enerxética. Pero tamén se afrontará a renovación do peche perimetral suroeste, xusto ao lado da entrada principal, que se acha en mal estado. Farase igual que os peches ao lado oeste e norte do recinto.
O contrato sae a licitación cun prazo máximo de obra de 42 días. O contratista haberá de proxectar a intervención de forma que a súa execución evite danar o céspede artificial do terreo de xogo.