Poderá visitarse ata o 6 de abril. A entidade tamén abriu unha exposición de Philip West
26 mares 2024 . Actualizado ás 04:55 h.A exposición «Paco Pestana, o curto voo dun paspallás» ampliará unha semana máis a súa presenza na Fundación Granell. Inicialmente estaba previsto que concluíse esta semana —o próximo día 31—, pero ampliouse ata o 6 de abril despois de recibir un gran número de visitas desde a súa apertura o pasado 1 de febreiro, segundo destacan desde a organización.
A mostra está conformada por unha vintena de pezas, que reúnen desde esculturas ata outros soportes. «É unha exposición feita por amigos a un amigo para reivindicar a súa traxectoria vital e a súa importancia na plástica galega, nacional e internacional desde os anos 70 á actualidade», explicaba na xornada inaugural a comisaria, Cristina Carballedo.
Exposición de Philip West
Por outra banda, a Fundación Granell acaba de inaugurar unha mostra articulada ao redor da presenza da máquina na obra de Philip West. O artista inglés recrea un mundo fantástico no que os personaxes imaxinarios adquiren condición de realidade e os obxectos cotiáns contémplanse desde unha visión innovadora que lles confire un halo de ficción. A súa imaxinación, segundo destacan desde a Granell, lévalle a plasmar nas súas pinturas numerosas confrontacións metafóricas. Así, conforma unha mano-rifle, unha bala de ollo humano ou un insecto-chisqueiro. A mostra «O corpo da máquina» está comisariada por Eduardo Valiña.