Os nenos que padecen cancro recibirán os beneficios do concerto do 5 de abril da tuna de Dereito

A tuna de Dereito da USC ofrecerá o próximo 5 de abril un concerto único para presentar o seu traballo Ruela 8. É o resultado de «dez anos de traballo intenso entre o 2013 e o 2023», explica Sebastián Fernández, o seu director musical desde o 2017. Sebastián está vinculado á agrupación musical desde moito antes, pero no 2017 asumiu unha dirección que «deu un xiro ao traballo da tuna. Creo que, seguramente, nalgún momento actuei con man dura, pero tamén penso que os meus compañeiros viron os beneficios dese traballo duro, e agardo que o entendan». A día de hoxe, «os estudantes da Universidade que queren entrar nunha tuna universitaria só teñen a opción da de Dereito. Hai outras, pero son de veteranos, que fan un bo traballo, pero non é o mesmo», sinala Fernández. O director musical séntese especialmente satisfeito do resultado de Ruela 8: «Inclúe dez cancións, entre as que curiosamente non hai ningunha con pandereita, que é o instrumento máis representativo das tunas universitarias». As cancións, indica, «foron escollidas entre todos e gravadas ao longo de dez anos. Son de diferentes países, daqueles aos que fomos a tocar ao longo dese tempo. Hai pezas de Colombia , Perú, México, e tamén unha polca galega instrumental, e Ruada, que é un poema en galego de García Lorca ao que lle puxemos música». Este cedé está á venda «por medio das nosas redes sociais e tamén o estará o día do concerto», pero é importante destacar que «os beneficios do concerto do 5 de abril destinaranse á Asociación de Axuda a Nenos Oncolóxicos de Galicia (Asanog)». Explica Fernández que, na creación do disco, «do que estamos orgullosos, participaron 20 persoas. Algúns membros da tuna e outros, por razóns de traballo, só participaron na gravación». Non escatimaron esforzos persoais e rodeáronse dun equipo «de profesionais de primeiro nivel», apunta. Os integrantes da tuna asistiron a clases de percusión con Leonel Aliaga: «Ensinounos as bases dos ritmos nas congas, bongos, maracas, cencerro». E con Miro Moreira: «Deunos moitas sesións de técnica vocal durante un par de anos». Os arranxos correron a cargo de Mario Cabuche, «que ten máis de 10 anos de experiencia nos estudos de Sony Music». O encargado da gravación foi Fernando Campos, en Edisco Recording Studios, na Estrada, onde «gravaron María do Ceo, Leilía, Treixadura e Paulina Rubio, entre outros». Sebastián Fernández chegou de Chile no 2007 para estudar cunha bolsa na Universidade de Santiago, onde cursou maxisterio musical. É coñecido polo seu labor musical a cargo de as aulas da terceira idade e por dirixir as corais da Rocha Vella e de Vite, ademais de por impartir clases na escola de música Alllegro.

---

---

---