Os bombeiros comarcais inician unha concentración indefinida e recollen firmas no Obradoiro

Bombeiros dos parques comarcais de Galicia iniciaron onte unha concentración indefinida na Praza do Obradoiro, na xornada en que se cumprían seis meses desde o inicio da folga o 15 de xuño para reclamar un convenio colectivo unificado para toda Galicia; ser considerados persoal laboral fixo tras asumir os consorcios provinciais, participados por Xunta e deputacións, a xestión directa dos parques; e o incremento de persoal no servizo. Son 24 bombeiros, en representación dos 24 parques galegos, os que se concentrarán diariamente desde as 9 ata as 21 horas, mentres pola noite serán de catro a cinco efectivos os que durman ao raso nos soportais de Raxoi, «porque a Subdelegación do Goberno denegounos a instalación de tendas de campaña como pretendiamos», indicaba desde a propia praza Honorino Raña, responsable do parque de Ordes .

A intención é manter a protesta ata que os traballadores decidan o seu cesamento en asemblea xeral, en función dos avances que poidan producirse nas negociacións coas administracións implicadas no conflito laboral. Nese sentido, cabe destacar que as partes manterán un encontro a próxima semana, para buscar desbloquear unha situación sen avances en todo este tempo, e que supuxo ao redor de medio milleiro de peches de parques comarcais nestes seis meses, por non acadar o mínimo de tres bombeiros para ser operativos.

Bombeiros participantes na mobilización onte, que mostraban unha pancarta na que se podía ler «A nosa loita é a vosa vergoña» tamén recolleron entre os visitantes ao Obradoiro asinas de apoio ás súas reivindicacións. Ademais, membros do comité de folga reuníronse co socialista Gómez Besteiro, e intentarán facelo con todos os candidatos á presidencia da Xunta.

---

---

---