O Concello de Santiago pechou de novo parques e instalacións deportivas ao aire libre para evitar riscos
05 novs 2023 . Actualizado ás 05:00 h.A borrasca Domingos, como a súa predecesora Ciarán, provocou un regueiro de incidencias en Santiago como consecuencia das fortes choivas e dos refachos de vento, que chegaron a 170 quilómetros por hora no litoral galego aínda que foron inferiores no interior. A incidencia máis grave viviuse na liña do ferrocarril á altura do remato municipal de Dodro , onde unha árbore caída ocasionou o corte temporal da vía e obrigou a trasladar en autobús aos viaxeiros da liña A Coruña-Vigo ata que se repuxo a normalidade.
No aeroporto foron catro os voos afectados, dous deles tiveron que ser cancelados e os outros dous desviados, segundo a información de AENA . Os avións procedían de Palma de Mallorca, AsPalmas , Sevilla e O Porto.
Os Bombeiros de Santiago tiveron moito traballo, pero menos do que agardaban en función da alerta que se lanzou. Tiveron unha vintena de saídas, dez delas por árbores caídas e outras tantas por fachadas, tellados, fiestras e canlóns que sufriron danos debido ao vento. As alertas déronse por toda a cidade, desde a zona monumental ata Sar, pasando por Vista Alegre.
En Lamas de Abade, un bloque de tres edificios sufriu unha pequena inundación no seu garaxe debido a que a acumulación de choiva coincidiu con que fallou a bomba de achique, polo que os Bombeiros composteláns tamén acudiron para axudar na inundación.
Como ocorreu esta mesma semana coa borrasca Ciarán, o Concello de Santiago procedeu ao peche de parques, xardíns e instalacións deportivas para evitar riscos por caída de árbores ou desprendementos de partes de edificios ou do mobiliario urbano. Na comarca, Teo foi xunto a Santiago o concello máis afectado por Domingos, cun total de catro incidencias. Ademais, os ríos Dubra e Tambre son dous dos que están en vixilancia permanente por risco de desbordamentos e inundacións no marco do plan Inungal da Xunta de Galicia, que segue activo.