O goberno local pide tempo para que o código de boas prácticas de Santiago dea resultados
SANTIAGO
Xan Duro di que a Policía Local cumpre co seu labor informativo
05 ago 2023 . Actualizado á 05:00 h.O goberno local pide tempo para que se implementen as medidas do código de boas prácticas, ante os escasos resultados que está a ter nos seus primeiros días, desde que se implantase o 31 de xullo. Xan Duro, concelleiro de Mobilidade, Convivencia e Centros Socioculturais, asegura que «dende a Policía Local están cumprindo ben a súa labor informativa».
Con todo, este xoves, na Praza do Obradoiro, desde as 11.30 ata as 13.30 horas, podíase observar como varios peregrinos, en grupo ou en solitario, estaban a comer na praza e incluso apoiados sobre as columnas do Pazo de Raxoi ante a presenza do corpo municipal, sen ser coñecedores destas novas medidas. Ningúns deles engadiron que o día anterior fixeran o mesmo e ninguén lles dixo nada.
No decálogo recóllense doce principios básicos para contribuír a fomentar un turismo respectuoso e de calidade, e nel faise mención a que o Obradoiro non é unha área de pícnic nin unha zona de acampada. E son os municipais os encargados de informar sobre estas nova medidas.
Xan Duro di respecto diso que «os axentes fan o seu traballo, pero tamén depende do criterio do propio policía. Evidentemente se hai alguén montando un pícnic, que estendeu un mantel e puxo alí as súas pizzas e as súas cervexas, deben levantarlle iso. Pero, si hai unha persoa apoiada nalgún lado comendo un bocadillo habería que ver o caso».
O concelleiro recoñece ademais que esta é unha cuestión de civismo, pero que «os avances neste tipo de campañas non se ven dun día para outro. Ademais hai que ter en conta que neste caso a policía, que está levando a cabo a campaña informativa, cada día fala cunha persoa nova. Aquí entran a diario centos ou milleiros de visitantes, e cada día empézase de cero», declara Duro.
En referencia ao barrio de San Pedro, o principal acceso de peregrinos, Duro asegura que «xa cambiamos a sinalética e reforzamos a seguridade. A policía está alí facendo controis, non de forma permanente, pero si ao longo do día. Sanciona se ten que sancionar e sobre todo informa á xente do que non pode facer si é preciso». Ademais sinala que a chegada dos grupos relixiosos que van atoparse co papa producen unha alteración inusual.