A oposición esixirá no Parlamento máis autonomía e recursos en oncoloxía pediátrica
SANTIAGO
O PPdeG comprométese a falar con Sanidade e a informar os pais
11 jul 2023 . Actualizado ás 12:33 h.As familias de menores con patoloxías oncohematológicas do CHUS seguen pedindo recursos e estabilidade para os profesionais que coidan aos seus fillos. Solicitárono á xerente do Clínico, ao conselleiro de Sanidade, ao director xeral de Asistencia Sanitaria... Pero non van renderse. Hai uns días reuníronse cos tres grupos parlamentarios para implicar aos políticos na súa reivindicación. Tanto BNG como PSdeG comprometéronse a rexistrar senllas iniciativas que se debaterán a partir de setembro, nas que se esixe basicamente o que demandan estes pais: recursos —sobre todo humanos— suficientes para dotar de maior operatividade a un servizo no que os profesionais «non poden ofrecer máis do que xa entregan», indican os socialistas, e autonomía.
Proxenitores e oposición piden que esta autonomía se materialice a través dunha xefatura de sección, por exemplo, como ocorre noutros hospitais españois. «É cuestión de vontade política, non de cartos, unha sección ou unha subsección non son unha cousa inusual, os casos de cáncer pediátrico teñen cada vez máis complexidade e requiren equipos estables e con persoas que poidan facer o seu traballo», explica a portavoz de sanidade do Bloque, Montse Prado.
Na mesma liña situarase o PSdeG, que insta o Parlamento a que recoñeza o traballo que están a levar a cabo os profesionais de oncoloxía pediátrica no CHUS, e a dotalos de ».. «unha estrutura organizativa que permita ter maior autonomía e capacidade de acción dentro do propio centro no plano funcional e de recursos, así como facilitar o incremento progresivo de dotación material e persoal que contribúa a unha consolidación e mellora das potencialidades neste área asistencial
Problemas para formarse
O que ocorre con estes facultativos é que ao non existir unha especialidade propia de oncoloxía pediátrica —algo que reclaman as sociedades científicas e coa que contan a maioría de países europeos— os profesionais teñen que formarse cando empezan a traballar nestas unidades, e ao haber unha escaseza de médicos notable no Clínico, deben facelo «por iniciativa propia, a custe propio e auto-organizándose», explica o PSOE. Outra tarefa necesaria, a investigación, é imposible actualmente porque o persoal «ten que ter dedicación absoluta ás labores asistenciais debido á falta de maior volume de persoal». Unha xefatura de sección permitiría, explican pais e oposición, autonomía para demandar recursos materiais e humanos que posibiliten levar a cabo esta formación nunha unidade que atende a decenas de menores e é referencia en Galicia xa que trata os casos máis graves.
Tamén o grupo popular comprometeuse cos pais. A portavoz de Sanidade, Encarnación Amigo, ofreceuse a reunirse cos responsables da Consellería de Sanidade para coñecer a situación desta unidade así como as posibilidades de incremento de recursos ou autonomía. «En setembro volverán reunirse cos pais para explicarlles como foi o encontro», apuntan desde a Cámara galega.
De cinco a dous facultativos
Os pais iniciaron esta batalla hai meses tras anos de espera. Desde o 2019 existe un compromiso para crear esta xefatura e tras tres anos sen formalizarse presentaron un escrito no rexistro da Xunta con máis de 2.500 firmas en xaneiro deste ano. Nos últimos meses, a precariedade do persoal ha ir a peor, pasando de cinco a dous facultativos, aos que hai que sumar un médico residente.