Completou as 46 etapas da travesía pirenaica, entre o Cantábrico e o Mediterráneo, a pesar das restricións da pandemia do covid-19
27 jul 2022 . Actualizado ás 15:26 h.Este verán quedará marcado na biografía de Jesús González García, por ter cumprido un reto persoal que se propuxo fai cinco anos, despois de vencer un linfoma, un cancro hematológico moi agresivo, para o que tivo que soportar sesións de quimioterapia de ata 96 horas no Hospital Clínico. Cando lle confirmaron que quedara limpo do tumor, aos dez días viaxou a Cantabria e percorreu o Camiño Lebaniego. Foi só un primeiro paso do que sería a gran aventura: percorrer máis de 400 quilómetros da travesía pirenaica, un das grandes rutas de España e de gran dificultade, que consta de 46 etapas, entre o Cantábrico, desde o Cabo de Higuer, no País Vasco, ata o cabo Creus, no Mediterráneo catalán. É a Gran Ruta número 11, na que se pasa por poucas poboacións, e máis ben pequenas e sen os servizos que caracterizan por exemplo ao Camiño de Santiago. Comezaron catro colegas no 2019, pero dous abandonaron o primeiro ano, cando o percorrido finalizou en Bujaruelo, no Pirineo aragonés. No 2020 interromperon o desafío, polas restricións impostas por mor da pandemia do covid-19. Retomárono no 2021, Jesús e o seu compañeiro Miguel Ángel Leira García, e camiñaron ata Andorra. E este mes completaron o traxecto ata o cabo máis oriental da península ibérica. O máis dificultoso foi o percorrido por Ordesa e Monte Perdido, explica Jesús. Teñen moito que contar, como que o ano pasado nevoulles en xullo; as noites de moito frío na montaña, a pesar de ser verán; as dificultades da onda de calor deste mes, que lles obrigaron a iniciar unha etapa ás 4.00 da madrugada; as esixencias do terreo, con moita pedra solta; transitar por paraxes onde non había cobertura de teléfono nin de Internet; ver helicópteros que realizaban rescates de excursionistas, que se extraviaron; algunha etapa de 14 horas con subidas e baixadas que puñan a proba a resistencia; os refuxios de montaña e o contacto coa veciñanza; e outros episodios nos que contrasta a dureza da experiencia coa beleza da paisaxe e intensas emocións. Jesús prevé volver en agosto, aínda que para un percorrido máis breve, de menos dunha etapa, para que a súa esposa coñeza aquilo, afirma. Esta é a máis dura das súas incursións na montaña, porque Jesús realiza percorridos moi frecuentemente, cos seus antigos colegas de Abanca. Sabe prepararse ben, porque coñece os riscos da montaña, tantas veces inesperados, e trata de previlos cun equipamento adecuado. Xubilado e con 61 anos, outra das súas grandes afeccións é o xadrez e é ben coñecido no club da USC.
HM Rosaleda ficha endocrina
O Hospital HM Rosaleda fichou a Alicia Santamaría Neto, especialista en endocrinoloxía e nutrición. Estudou Medicina na Universidade de Santiago, especializouse no CHUS e ampliou a súa formación no Hospital A Fe de Valencia e na Autónoma de Barcelona. Alicia ten experiencia en investigación, con varias publicacións. Participou en ensaios clínicos e obtivo galardóns. Potenciará o servizo de endocrinoloxía e nutrición de HM, que ten unha demanda cada vez maior.
Hotel reinaugurado
A reinauguración do Hotel Peregrino convocou boa parte do sector turístico e de viaxes. A Amancio López Seijas, líder do grupo Hotusa, víuselle departir con Ghaleb Jaber Ibrahim, do Araguaney. O experimentado axente de viaxes Agustín Vázquez Pedreira veu desde A Coruña para reencontrarse con Alberto Varela Núñez, responsable da axencia de viaxes del Corte Inglés en Santiago, e Sara Rey Martínez, quen traballa na tenda de Purificación García. Agustín e Alberto rememoraron os tempos compartidos na axencia Ultratur, en Porta Faxeira, nos anos 90. Á conversación uniuse Thierry Berger de Parseval, delegado comercial de Hotusa. Tamén asistiu María Caeiro Rey , nacida no barrio de Santa Marta e agora presidenta dos concesionarios Renault da provincia. ¡Bo camiño, Peregrino!