Pedro Vázquez Fernández recibiu sepultura en Melide
28 oct 2020 . Actualizado á 05:00 h.O sábado faleceu Pedro Vázquez Fernández (1957-2020). Foi enterrado o domingo no Cemiterio do Castelo, en Melide. Foise un condutor e un empresario de transportes coñecido en todo o país. Comezou no sector en 1981, traballando con Amancio Ortega nos inicios de Inditex. Axudaba aos seus compañeiros para embalar a roupa e cargala no camión, que el mesmo conducía ata Barcelona e outras cidades.
En 1989 fundou Transportes Ruta, sen deixar de atender a loxística de Inditex. Foi pioneiro en que a téxtil galega lograse enviar os seus produtos a toda Europa, trasladando as mercancías ata o aeroporto de Alvedro, e desde alí, ao continente. Transportes Ruta creceu á vez que Inditex. Foi ampliando e mellorando a súa flota de camións, e de levar pezas ata Alvedro pasou a facelo tamén aos aeroportos de Santiago, Madrid, Barcelona, Porto ou Lisboa.
No 2007 foi necesario adecuarse ás novas tecnoloxías para o transporte aéreo, e Pedro volveu ser o precursor dos novos sistemas de carga e descarga en avións, con plataformas e técnicas que optimizaban as operacións. Pero, ademais da capacidade de innovar, levaba nos seus xenes a necesidade de coller o volante. Xamais deixou de atender as solicitudes dos seus socios, aínda que tivese que facer el mesmo de chofer. Pedro foi tamén presidente da Asociación Coruñesa de Transportes Discrecionais e Especiais. Atur Loxística de Transportes queda en mans da súa viúva, Vicenta González Gómez, e dos seus fillos Miguel, Alejandro e María, que xunto con Alberto, Sara, Diego, Lucía e Pedro recibiron estes días multitude de mostras de condolencia.