Jesús Cernadas: «Para recuperar puntos do carné de conducir hai moita lista de espera»

Os dous centros de recuperación de puntos do carné de conducir en Santiago funcionan con normalidade, pero entre as autoescolas mantéñense numerosos ERTE e aínda poucas están abertas. Ambas as actividades, como os exames de condutores, notarán novidades derivadas da pandemia de covid-19. «O luns puidemos empezar a traballar, pois nos incluíron na fase dúas da desescalada, tras modificar o BOE o sábado. En Santiago a formación teórica non empezou. Só dúas autoescolas comezaron coas prácticas do alumnado que está pendente de exame. O resto, ou non abriron, e prevese que o fagan o 1 de xuño [o vindeiro luns], ou teñen só atención a clientes, pero sen clases», afirma Jesús Cernadas, empresario do sector e directivo da asociación provincial.

«Tráfico empezou este luns. Esta semana examinan só para mercancías perigosas e para condutores que deben recobrar o permiso por puntos e que quedaron pendentes a causa do confinamento. A semana próxima, entre o 2 e o 5, empezan os exames teóricos e os prácticos programados antes do estado de alarma. A partir do 8 de xuño empezan a examinar nos circuítos e a convocar para exames de estrada. As autoescolas teñen isto en conta e pénsanllo para abrir», agrega.

Ademais, apostila, «Santiago é unha cidade onde pesan moito os estudantes universitarios, e máis da metade marcháronse para casa, e doutras provincias aínda non poden volver para practicar e examinarse. Algúns non volverán ata o curso que vén. Perdemos moito alumnado co que contabamos a mediados de marzo. O verán vémolo perdido, moi parado», manifesta.

Jesús Cernadas sinala que «xuño e xullo son, desde hai anos, dous meses moi fortes de matrícula nas autoescolas de Santiago, de mozos universitarios ou que aproban a selectividade. E despois, setembro e outubro. Tamén noutros municipios, como os de Barbanza, é no verán cando teñen máis demanda. Este ano preséntase complicado. As perspectivas sen dúbida non son boas».

Deberán adaptarse á nova situación, porque «cambian moitas cousas, polas esixencias de hixiene e seguridade. Agora haberá que facer limpeza e ventilar o vehículo entre prácticas. Así, no canto de 45 minutos, van ser prácticas dunha hora. Cos exames igual: redúcese o número, no canto de 12 van ser 10, para que tamén de tempo a limpar o vehículo entre alumnos».

A situación é diferente nos centros de recuperación de puntos do carné de conducir, aínda que tamén resultan afectados pola pandemia de covid-19 e funcionan con restricións. «Para recuperar puntos do carné de conducir hai moita lista de espera. Por unha banda están condutoras e condutores que tiñan previsto realizar o curso nestes tres meses e téñeno pendente. E agréganse a maiores quen perderon puntos no confinamento por infraccións, mesmo persoas que non podían conducir, por ter o carné retirado e sancionáronlles tras sorprenderlles», precisa Cernadas.

As novas esixencias, como consecuencia da experiencia da pandemia, tamén as notarán nos centros de recuperación de puntos do carné, nos que Jesús Cernadas é así mesmo formador. «Temos restricións de alumnos por curso. En aulas onde antes se podían atender ben 15, agora como moito están 8, para manter a distancia. Pero hai que facelo, e de feito os dous centros de Santiago, o do Polígono do Tambre e o de Sar, funcionan xa a pleno rendemento e con programación de varios cursos», destaca.

---

---

---