Os músicos galegos acaban de chegar dunha xira de 16 concertos por Norteamérica
12 abr 2016 . Actualizado ás 09:28 h.Uxía e Fran Pérez, Narf, acaban de regresar dunha xira de 40 días por Estados Unidos. E se hai unha verbo que onte repetiron ao facer balance das dezaseis actuacións que levaron a cabo é o de «fascinar». «Vimos que quedan fascinados coa cultura galega e, despois, interésalle afondar», asegurou Narf, engadindo que queda demostrado «que a nosa cultura ten poder de sedución». «Están fascinados por outra maneira de contar», recalcou Uxía. Ambos destacaron que o público quedou sorprendido pola mestura de pandeireta e guitarra eléctrica, de tradición e modernidade.
Uxía e Narf ofreceron concertos tanto pola costa Oeste como pola Leste, actuando tanto en espazos universitarios como noutros locais como museos, teatros ou escolas de música. Na súa xira detivéronse en cidades como Los Ángeles, San Francisco, Boston ou Nova York, entre outras. En moitos dos lugares, segundo destacaron, indicáronlle que era a primeira vez que programaban música en galego. «O noso desafío era traballar no ámbito propio do país», destacou Narf, xa que non ofreceron ningunha actuación en centros de emigrantes.
Os músicos, que comezaban a súa actuación con «Sempre en Galicia» de Castelao, destacaron que en EE.UU. o que máis se coñece de Galicia é o Camiño de Santiago, pero descoñecen outros aspectos como que conta cunha lingua propia. «Era moi interesante ver a reacción da xente cando lle explicabas quen era Rosalía», asegurou Narf.
Para os dous autores galegos, esta xira, organizada por Marina Carracedo -lectora de español na Universidade de UCLA-, e na que contaron co apoio de Culturactiva, pode servir de punta de lanza para outros músicos.