Unha afectada recorre a decisión e anuncia que apelará á vía xudicial
30 oct 2014 . Actualizado ás 05:00 h.O Concello non dotará de medidas de accesibilidade ata o 2017 nin cambiará ningún aspecto da súa ordenanza para facilitar a entrada da xente discapacitada nos autobuses. Así llo comunicou a Anxela López, presidenta de Vigalicia, que se move en cadeira de rodas e ten difícil acceso ao transporte público. Anxela presentou antonte un recurso de reposición antes as instancias locais e anuncia que seguirá a vía xudicial no caso de que Raxoi non resolva a mobilidade dos incapacitados.
As persoas que se moven en cadeira de rodas séntense discriminadas, a pesar de todas as normativas favorables, á hora de subir aos autobuses. Segundo a resposta do propio Concello aos seus requirimentos, só o 50 % dos autobuses urbanos de Tralusa posúen sistemas de accesibilidade para persoas impedidas.
Os vehículos que posúen mecanismos de elevación téñenos de dous tipos, ramplas telescópicas automáticas e ramplas manuais. Os que dispoñen destas últimas téñenas de adorno, salvo que a persoa con cadeira de rodas leve a un acompañante que a active. E se non é así, o viaxeiro queda en terra, xa que o condutor non sae do seu asento para manipular o mecanismo. Ampáralle a ordenanza local. E é raro levar a un acompañante para subir a un ao autobús.
Só queda a opción das ramplas automáticas, pero hai autobuses nas que estas non funcionan. Anxela López viuse obrigada a non poder tomar un bus por ese motivo. En concreto, na súa denuncia recolle a imposibilidade de utilizar os vehículos da liña 11 por non funcionar o sistema automático. Só queda a alternativa de agardar a un novo autobús no que funcione a rampla. Pero iso é un risco, porque a frustrada viaxeira pode eternizarse nunha parada. «Solo me queda a opción de desplazarme durante 45 minutos até o centro e mollándome se chove. Non podo esperar ao 2017», di indignada.
Na súa demanda reclama ao Concello unha inspección dos autobuses e que inicie un expediente sancionador contra a concesionaria polas ramplas avariadas, o que supón un incumprimento da empresa. «Esta é unha circunstancia que se produce reiteradamente», di.
A negativa do Concello a establecer modificacións para garantir a accesibilidade antes do 2017, en que estará renovada a flota de vehículos, vulnera as normativas, legal, autonómica e estatal, así como a Convención da ONU sobre os dereitos das persoas con discapacidade, segundo a demanda de Anxela.
«Noutros concellos, por exemplo o de Valencia, o condutor ten que accionar a rampla manual»
Ánxela López