O Concello de Dodro fai pública, a través das distintas concellarías, a súa programación de Nadal para este ano, que vén «cargada de actividades para todas as idades». Arrinca mañá mesmo co fallo da edición número 24 do Premio de Poesía Eusebio Lorenzo Baleirón.
Así, o xurado reunirase ás doce da mañá na casa de cultura de Dodro, coordinado por Helena Villar. Está presidido polo alcalde, Valentín Alfonsín Somoza. e formado, ademais, pola secretaria do Concello, Cristina Codesido (edila de Cultura), Carlos Negro Romero , Román Raña Lama, Rosa Enríquez Noya e Luis Vale Regueiro, este último en calidade de gañador da pasada edición.
Tras o fallo, haberá unha ofrenda floral no lugar no que repousan os restos de Eusebio Lorenzo Baleirón, no cemiterio parroquial de San Xulián de Laíño. Xa o domingo 18 de decembro, ás cinco da tarde, haberá un acto público no que se fará entrega do premio no Centro Público Integrado Eusebio Lorenzo Baleirón e coa actuación do grupo de nome Campo de Estrelas.
Dentro da programación de Nadal, a concellaría de Deportes organiza o día 17 a terceira xornada benéfica deportiva. Inclúe un campionato de fútbol na modalidade de dúas por dous dirixido a todas as idades, un circuíto pechado para bicicletas e un campionato de portería inchable. Durante esta xornada recolleranse alimentos non perecedoiros que serán distribuídos entre as familias con menos recursos do municipio.
Teatro
Xa os días 19, 20 e 21 de decembro esta mesma concellaría organiza o primeiro Mundialito de Fútbol sala por aldeas do concello de Dodro. Terá lugar no pavillón municipal e haberá dúas categorías.
Pola súa banda, as concellarías de Cultura e Xuventude e Familia organizan conxuntamente actuacións de teatro para todas as idades para o día 22, ás oito da tarde no salón da Paxareira. A obra que representará o grupo Os Tolitates titúlase Ou merlo branco.
O Concello traballa, ademais, nos preparativos da cabalgata de Reyes Magos.