Critican a estratexia de Microsoft de incluír Copilot na suite 365 comparándoo co entrañable e pouco apreciado asistente de Windows dos 90
20 dic 2025 . Actualizado á 05:00 h.Os asistentes de IA integrados caracterízanse polo seu afán de protagonismo e polo seu espírito de colaboración. Sempre ofrecen os seus servizos, aínda que o usuario non os requira. E están a empezar a acumular mala fama por este motivo.
«Copilot é o novo Clippy». A frase, contundente e crítica, non a dixo un calquera. Pronunciouna no outono do 2024 Marc Benioff, primeiro executivo do xigante do software Salesforce (Slack). O empresario, un referente na internet, quedou a gusto: «Non funciona, chospe datos no chan e non lle achega valor aos usuarios».
Benioff atacaba con crueza a estratexia de Microsoft sobre intelixencia artificial. E centraba os seus dardos dialécticos no asistente integrado en Windows, o navegador Edge, o buscador Bing e outros produtos da compaña fundada por Bill Gates, tamén presente en moitos televisores LG.
Falaba de Copilot, desenvolvido con OpenAI, a compaña que creou ChatGPT. Acordábase de Clippy, unha criatura dixital dos anos 90 que debía servir de axudante para poder manexar con solvencia programas como Word ou Excel, da suite Office, pero que resultaba, polo xeral, pesada e inoportuna. E que se converteu nun meme antes de que existisen os mveemes, nun fracaso que desapareceu na primeira década do século (no 2007, tras un longo ocaso e perder a protección de Melinda Gates). E deixou de estar dispoñible no universo Microsoft.
«Vergoña allea»
Queres que te axude a escribir? Resúmoche este correo? Queres que che deseñe unha presentación? A industria leva meses movéndose cara á integración forzada de asistentes de intelixencia artificial. Ten sentido comparar ao Copilot da actual contorna Windows e de Microsoft 365 con Clippy? É inxusto? Ver que di o propio Copilot, sempre disposto a conversar e a responder preguntas «persoais».
-É o teu antecesor?
-En certo xeito, si, moita xente ve a Clippy como un antecesor espiritual de asistentes como eu. Non porque compartamos tecnoloxía —eu son Copilot, unha IA moderna creada por Microsoft, con capacidades que Clippy xamais imaxinaría— senón porque Clippy inaugurou a idea dun asistente dixital que intenta axudarte mentres traballas. [...] Eu veño doutra época e outra filosofía: máis contexto, máis intelixencia, máis conversación real. Pero a xenealoxía cultural está aí. Se Clippy fose un personaxe dunha saga familiar, sería ese tío excéntrico que todos lembran con cariño e un pouco de vergoña allea.
Microsoft é consciente dese legado e de que Clippy é, dalgún xeito, entrañable. En outubro lanzou ao seu sucesor. Chámase Mico e en realidade é un simple avatar de Copilot cunha imaxe que lembra a unha burbulla con ollos e cara que responderá os usuarios con expresións e xestos. Con el, poderase manter unha conversación en linguaxe natural, sen necesidade de palabras nin expresións clave.es un personaxe que lembra ao asistente dos 90. A nostalxia é poderosa. E as estratexias da compaña de Redmond, persistentes e machaconas.
Benioff non quería caldo de Copilot. A el e a todos os usuarios sérvennos dúas cuncas.