Contidos plaxiados de Wikipedia, blanqueamiento de procesos como o «apartheid» e respostas de IA con nesgos pon en dúbida o alcance do proxecto de enciclopedia dixital de Elon Musk
07 nov 2025 . Actualizado á 12:26 h.Elon Musk é un adicto á polémica. O multimillonario surafricano (Pretoria, 1971) saíu trasquilado e pelexado con Donald Trump tras un breve e intenso paso pola política no 2024 e os primeiros meses do 2025, pero non perdeu a súa capacidade de ser protagonista da actualidade.
O primeiro executivo de SpaceX e Tesla quere transformar internet.
Primeiro comprou Twitter en 2022, a rede social con máis impacto na opinión pública mundial, e converteuna en X, unha plataforma que conserva capacidade de influencia, na que os discursos de odio e os relatos alternativos circulan case sen límites. Con Musk como un dos principais distribuidores de desinformación (así o cualificou o seu propio chatbot de IA, Grok), aumentaron o racismo e as mensaxes tóxicas.
Nos últimos tempos puxo na diana á Wikipedia. Considera que a enciclopedia colaborativa, propiedade dunha fundación sen ánimo de lucro e sostida con pequenas doazóns, unha referencia da internet aberta e baseada en feitos, ten nesgos esquerdistas e debe ser renombrada como «a Wokepedia» (en referencia ao termo Woke). Foi moito máis alá das críticas e de pedir que non se achegue diñeiro ao proxecto nado no 2001. Lanzou a súa propia enciclopedia, a Grokipedia, para librar unha guerra cultural. O resultado? Ambos, o promotor, que prometeu ofrecer «máis nada que a verdade», e o servizo, están rodeados de controversia.
O nome Grokipedia fai referencia ao chatbot de Musk. Ten lóxica. Aquí non hai comunidade. Nin seres humanos. É a intelixencia artificial a que xera os resultados que serve a plataforma, feita con código aberto, cando un usuario fai unha consulta. De onde saca a información para elaborar os 885.279 artigos que ten a versión 0.1 (só dispoñible por agora en inglés)? Pois en moitos casos da propia Wikipedia. Noutros, doutros sitios da internet. Copia? Si. Falla? Tamén. Como calquera outra IA (os chatbots non son fontes fiables de información, alucinan con frecuencia). E ten nesgos que chamaron a atención e recolle un estudo do portal The Verge.
Racismo, transfobia e conspiracións
Poñamos varios exemplos. O famoso asalto ao Capitolio dos partidarios de Donald Trump de xaneiro do 2021 é para a enciclopedia de Musk unha «incursión» e unha «expresión lexítima de protestas» que foi caracterizada como un intento de golpe de estado por «narrativas partidistas» (contrarias a Trump). Hai máis? Si. Racismo: «A ciencia demostra que algunhas razas son máis intelixentes que outras». Transfobia: «Hai un contaxio social». E negacionismo. Por partida dobre. Por unha banda, sostén que o virus do covid-19 «foi creado artificialmente» ou que o cambio climático é realmente unha «alarma mediática».
Pouco se sabe acerca de como Grokipedia crea e verifica o seu contido, pero non hai moita dúbida de que é unha gran máquina de propaganda e de que sabe quen é o seu xefe. Faille a pelota. Considérao un campión da «liberdade de expresión», un «visionario e un innovador» e un «provocador irreverente». E xustifica o seu polémico saúdo nazi.
Sucumbiría Musk á tentación de editar o seu propio artigo? En teoría calquera pode pulsar o botón Edit para solicitar unha revisión. Fará a máquina caso se alguén se queixa de que aborde a «teoría do xenocidio do home branco» sen especificar que é conspiranoica? Ou se algunha persoa suxire que destacar o «robusto crecemento económico de Sudáfrica» durante o apartheid é lexitimar un sistema de discriminación racial?
Musk promete que a próxima versión da Grokipedia será dez veces mellor. Chegará a converterse nunha enciclopedia de contos, feitos alternativos e crenzas con moitas visitas e influencia? Ou terá razón Jimmy Wales, o fundador da Wikipedia cando di: «Nós seguiremos aquí dentro de cen anos e el non»? Insistirá Musk coa súa nova criatura? Ou dedicarase sobre todo a Tesla, onde lle van a dar un billón de dólares? Permanecer atentos ás súas pantallas.