Vivendas gratis para os médicos que reforcen os centros de saúde de Sanxenxo no verán
SANXENXO
O Concello farase cargo do custo do alugueiro entre o 1 de xuño e o 30 de setembro
13 jun 2022 . Actualizado á 19:57 h.Incentivar a contratación de médicos que reforcen o servizo de atención primaria en Sanxenxo é o obxectivo co que esta mañá asinouse un convenio piloto entre o alcalde, Telmo Martín; o xerente do Sergas, José Flores e o responsable da área sanitaria de Pontevedra e O Salnés, José Ramón Gómez. O Concello de Sanxenxo farase cargo do alugueiro de catro vivendas durante os meses de verán. Para iso, xa realizou unha retención de gasto de ata 32.000 euros. Porá estes pisos ao dispor dos médicos de familia de fóra de Galicia que queiran ir traballar aos centros de saúde de Sanxenxo entre o 1 de xuño e o 30 de setembro. Tan só quedan catro días para que arrinque a tempada alta na capital turística das Rías Baixas.
Neste período o municipio chega a quintuplicar a súa poboación e é habitual a sobrecarga dos profesionais, especialmente no ambulatorio de Baltar. «O labor dos médicos que se xa era antes recoñecida, ahora tras a pandemia o é moito más», sinala Telmo Martín, que con este convenio agarda que se poida dar unha maior mellora asistencial: «Levamos meses falando con Sanidade para impulsar a contratación de médicos durante un período de sobreesforzo asistencial como é o verán. O Concello farase cargo do alquiler durante estes meses». As vivendas serán dunha ou dous cuartos, o que abre a porta a que poidan ver máis de catro profesionais os que reforcen os centros de saúde. Desde o Concello sinalan que nestes momentos están abertas todas as posibilidades.
O xerente do Sergas, José Flores, destacou esta mañá en Sanxenxo a iniciativa e subliñou que se trata dun programa, que no caso de obter os resultados agardados, podería ser estendido a outras entidades locais que presenten as mesmas necesidades conxunturais. «Todos coñecemos o déficit de médicos en atención primaria e o que se busca é atraer profesionais médicos de fóra de Galicia», engadiu Flores, tras a firma, onde non quixo pasar por alto o «grandísimo esforzo que fan xa os nosos traballadores de atención primaria».
Para a coordinación e seguimento do convenio crearase unha comisión composta por dúas persoas representantes da área sanitaria e dúas, do Concello de Sanxenxo.
A falta de facultativos en Sanxenxo é un problema que vén de longo e que se repite cada verán ao aumentar a poboación. O último foi especialmente complicado no centro de saúde de Baltar, ambulatorio de referencia para veciños e turista. A incidencia do coronavirus non fai máis que agravar e evidenciar a falta de médicos, sobre todo no Punto de Atención Continúa (PAC). As queixas pola falta de persoal sucedéronse todo o verán. O propio alcalde recoñeceu en setembro a «sobrecarga» do servizo. E é que no centro de saúde de Baltar atendéronse a unha media de 60 pacientes por día e consulta, pero no PAC houbo xornadas nos que pasaron unha media de 113 persoas en xullo e 95 en agosto.