Pontevedra acolle esta fin de semana o Río Verbena Fest, un festival para todos os públicos
PONTEVEDRA CIUDAD
Vetusta Morla, Leiva ou Trono tocarán no recinto feiral
23 ago 2023 . Actualizado á 16:45 h.O alcalde de Pontevedra, Miguel Anxo Fernández Lores espera que o Río Verbena Fest, que «chega tralo éxito que foron todos os concertos e espectáculos das festas da Peregrina», sirva de continuidade á programación dun verán no que «Pontevedra está a botar por fóra».
O festival en si celebrarase o venres e o sábado, pero o Concello e a propia produción do Río Verbena Fest aproveitado para quentar o ambiente cunha dobre cita este mesmo mércores Iván Ferreiro, ás 21 horas, como Leiva, ás 23.30 horas, ambos na chaira do recinto feiral.
Eles súmanse á programación dos días 25 e 26, que mesturará trap, música urbana, grupos locais e outros estilos musicais. Xunto a Lores presentaron o festival Kin Martínez, da axencia musical Esmerarte, e Marta González e Álvaro Ibaibarriaga, ambos dA Gramola. Sinalou Lores que o festival «complementa esa idea, cunha programación de altísimo nivel que amplía o Pontevedra Verán Fest». Cun «porcentaxe altísimo» de entradas vendidas e moita xente vindo de fóra de Pontevedra, Kin Martínez recalcaba o valor cultural e socioeconómico que ten o festival para a cidade.
Talento pontevedrés
O festival non contará unicamente con artistas consagrados como Vetusta Morla, Dellafuente, SFDK, Trono ou Xoel López, senón tamén con bandas locais para as que un escaparate destas dimensións supón un grande impulso. «É importante que estes grupos que tocan nas nosas rúas, nas sesións vermú, teñan a posibilidade de ter un espazo deste tipo, que poidan medrar e vivir da música», comentou Marta González. O talento pontevedrés estará presente no Río Verbena Fest con Chroma, A Mosca Valente, Condutores Suicidas, Desconcerto, Ou Rabelo e Certain People.
«O obxectivo do Río Verbena Fest é complementar a oferta xa existente, Eu son o primeiro en gozar co Surfing the Lérez, o Galegote e outras propostas na cidade; agora simplemente imos ampliar esa oferta con artistas que teñen como estratexia comercial, normalmente, non participar en concertos de balde e si noutro tipo de eventos», sinalou Kin Martínez.