O ciclo Urbtopías analiza o papel da cultura como estratexia urbana
PONTEVEDRA CIDADE
Esta tarde intervirán no Museo Ana Isabel Amaral, Manuel Vilas e Ramón Rozas
18 oct 2021 . Actualizado ás 05:00 h.O papel transformador da cultura para crear cidades inclusivas, seguras e sostibles, capaces de atraer e reter talento e xerar valor económico será obxecto de debate esta tarde no Edificio Castelao do Museo de Pontevedra. Será a partir das 19 horas, coa segunda das charlas organizadas no marco do ciclo Urbtopias As cidades posibles. A sesión pode seguirse presencialmente ou a través da retransmisión en directo pola canle de Youtube do Concello de Pontevedra, que organiza o ciclo en colaboración c a Deputación.
Para debater sobre a cultura como estratexia urbana, o debate contará coa presenza de dous escritores de recoñecido prestixio e dous xornalistas.
Ana Luisa Amaral, gañadora da última edición do Premio Reina Sofía de Poesía Iberoamericana, será unha das relatoras na mesa redonda. Acompañaralle Manuel Vilas, e finalista do Premio Planeta 2019 coa novela Alegría. Xunto a eles estarán o xornalista cultural Ramón Rozas e a tamén xornalista Pilar García Rego, que exercerá de moderadora.
Urbtopías continuará o vindeiro xoves co encontro titulado Recompor a forma urbana. A incidencia do espazo público, no que participarán Francisco Mangado, arquitecto e impulsor da Fundación Arquitectura e Sociedade; Joan Clos, ex-Director executivo de ONU Hábitat e presidente de AGORA, The New Urban Conversation e Miguel Anxo Fernández Lores, alcalde de Pontevedra. Moderará a charla a xornalista Ana Pardo de Vera . E concluirá o 27 de outubro con Repensar o espazo urbano. Novas formas de habitar a cidade, tema sobre o que debaterán a arquitecta Teresa Táboas e o economista urbano e Director de Placemaking Europe, Ramón Marrades. Este último debate moderarao a xornalista Susana Regueira.