A piscina municipal de Caldas xa utiliza as súas 40 placas solares para aforrar enerxía
CALDAS DE REIS
O Concello nota unha baixada no consumo enerxético da instalación deportiva, que prevé multiplicar co xestor intelixente
02 abr 2025 . Actualizado á 09:58 h.A piscina municipal de Caldas de Reis xa ten en activo as placas solares coa que se autoabastece de enerxía. O tenente de alcalde e concelleiro de Deportes, Manuel Fariña (BNG), afirmou este martes que durante o mes que pasou desde a súa instalación xa se nota un aforro no consumo enerxético. A intención do goberno local é que os importes que paga o Concello polo consumo de electricidade do equipamento deportivo baixen un mínimo dun 30%. Unha cifra, din desde o Concello, que se pode superar amplamente e incluso multiplicar se se fai un uso optimizado do sistema.
Os paneis fotovoltaicos instaláronse no mes de febreiro no tellado do edificio do pavillón, nunha superficie de 800 metros cadrados nos que a luz solar incide sen ningún tipo de barreira. Colocáronse 40 placas de 550 Wp (watts pico) cada unha para producir máis de 23.200 quilowatts. «A nosa intención é utilizar o xestor intelixente, que mide todos os datos relativos á produción e ao consumo e vai crear recomendacións de uso personalizadas, coordinando o funcionamento cos equipos eléctricos da piscina e do pavillón. Agora estamos a dar os primeiros pasos, pero a intención é sacar todo o proveito posible e facer máis sustentable a piscina», expón o edil.
A piscina de Caldas disporá tamén dunha pantalla que informará sobre a xeración eléctrica en tempo real, visible para as persoas que visiten o edificio da rúa José Salgado. Haberá así mesmo un sitio web de consulta pública que deberá facilitar a información de produción eléctrica en tempo real e datos históricos da instalación. Os paneis solares colocáronse grazas ao proxecto presentado no Instituto para a Diversificación e Aforro da Enerxía (IDAE) polo anterior goberno da Deputación de Pontevedra no ano 2022, para conseguir fondos do Plan de Recuperación, Transformación e Resiliencia. Foi dentro do Programa de axudas a proxectos singulares locais de enerxía limpa en municipios do reto demográfico (Programa DUS 5000). Desde o bipartito de Caldas sinalan que esta iniciativa pretendía a mellora enerxética en edificios, o fomento de investimentos verdes e, en particular, o autoconsumo.
Manuel Fariña destaca que o Concello de Caldas esta traballando tamén na instalación doutros campos de paneis solares noutros inmobles de titularidade municipal. O concelleiro lembra que incluso se redactara un proxecto para colocar as placas no edificio do Concello, «mais non fora posible polos impedimentos esgrimidos pola Xunta de Galicia dende o seu departamento de Patrimonio, ao tratarse dun inmoble emblemático e con protección».