Trátase dunha nova proposta da Real Academia Galega
31 oct 2025 . Actualizado á 14:57 h.Este mércores, 5 de novembro, Castelao inaugurará no Museo de Pontevedra o ciclo Momentos da cultura galega, unha nova proposta da Sección de Historia da Real Academia Galega (RAG) que afondará na etapa do intelectual no exilio de Buenos Aires —onde faleceu en xaneiro de 1950— e na súa relevancia no seu legado intelectual, político e artístico. Deste xeito, o programa, aberto a todo o público e que coordina o director da Sección de Historia, Ramón Villares, contará coas intervencións do presidente da RAG, Henrique Monteagudo, o catedrático de Historia Contemporánea da USC Xosé Manoel Núñez Seixas e a directora da propio Museo, Ángeles Tilve, así como se pechará coa proxección das imaxes de Castelao na capital arxentina custodiadas pola Filmoteca de Galicia.
Neste sentido, Ramón Villares precisou que «a palabra momentos está bastante acreditada na historia intelectual europea. Serve para remarcar o papel que ás veces exerce nun contexto cultural determinado unha obra, outras un individuo, en ocasións unha institución (...). Tense falado moito, por exemplo, do momento Maquiavelo por parte dos politólogos franceses ou do momento Sartre en Francia. Para o noso caso, temos varios exemplos, e decidimos comezar por Castelao neste ano que se lle dedica, cadrando co seu 75 cabodano, porque marcou profundamente varios aspectos da cultura galega. Queremos reflexionar sobre a importancia que tivo como autor, na política do exilio e no desenvolvemento da estratexia para a construción do que el chamou a Galiza ideal», engadiu.
En canto aos relatorios, está previsto que Henrique Monteagudo aborde con De Sempre en Galiza a Alba de Gloria ao Castelao ensaísta e orador. O título da súa conferencia fai referencia ao volume que publicou en Buenos Aires en 1944 e o derradeiro discurso público que pronunciou tamén na capital porteña o 25 de xullo de 1948.
Pola súa banda, Ángeles Tilve falará de As cruces de pedra na Galiza: o cumio do Castelao investigador no exilio centrándose no estudo que iniciara nos anos 20 e que rematou ao outro lado do Atlántico, mentres que o historiador Xosé Manoel Núñez Seixas pronunciará o relatorio Castelao e a construción da «Galiza ideal» no exilio (1940-1950).
Dende a Real Academia Galega precisaron que organizan Momentos da cultura galega. Castelao en Buenos Aires coa colaboración da Deputación de Pontevedra e do Museo de Pontevedra. Esta xornada poderase seguir en directo dende academia.gal e a canle de Youtube da RAG.
Ano Castelao
Con esta iniciativa a RAG continúa a celebrar o Ano Castelao. Así, o 7 de xaneiro, día do seu pasamento, abriu o sitio web Castelao na Academia (academia.gal/ano-castelao), espazo para achegar ao público xeral a gran figura política e cultural da Galicia contemporánea, membro de número da institución. «Mentres Castelao viviu no obrigado desterro, a Academia non declarou vacante a súa cadeira, en recoñecemento ao seu legado e á súa significación. Tras o seu pasamento, conservou viva a súa memoria e neste Ano Castelao volve poñer o foco no seu pensamento», precisaron ao respecto.
Este espazo web consta de dúas seccións. Por un lado, Castelao na RAG, no que se presentan de maneira divulgativa materiais da Academia relacionados co intelectual que poden ser de interese para a comunidade investigadora e tamén para o público xeral, e por outro, Pezas destacadas, onde membros da RAG e outros especialistas presentan cada mes unha peza senlleira relacionada coa biografía ou a obra do insigne galeguista.