A senda de Mollavao a Vos Praceres estará lista no 2026 ao lograr o si de ADIF
PONTEVEDRA
A Consellería de Vivenda e Planificación de Infraestruturas sinala que a obra se acelerou tras obter o permiso ferroviario
10 sep 2025 . Actualizado á 14:51 h.A creación dunha senda peonil e ciclista segura na PO-546, vial autonómico máis coñecido como a estrada vella de Marín, estará lista en prazo, é dicir, para a súa inauguración no 2026. A Consellería de Vivenda e Planificación de Infraestruturas admite, nunha resposta no Parlamento de Galicia, a existencia de dificultades por falta de informes de ADIF e de Costas, pero sinala que se puido liquidar a primeira destas e que iso permitiu axilizar os traballos.
O tramo referido pola Administración autonómica comprende a PO-546 entre Mollavao, á altura da ponte do ferrocarril que sobrevoa esta estrada e a rotonda de Vos Praceres, antes da gran glorieta que hai debaixo da autovía de Marín. É un trazado que supón tres quilómetros e medio e que, a pesar de ser moi transitado, carecía de beirarrúas adecuadas en gran parte do seu traxecto e contaba tamén con problemas en canto á seguridade viaria de ciclistas, ademais de deixar sen regular os aparcadoiros en boa parte do seu trazado. Todos estes problemas soluciónanse ou polo menos ordénanse coas obras en execución.
Os traballos comezaron en outubro do 2024, partindo desde Mollavao cara a Vos Praceres. E n unha resposta a unha pregunta formulada polo deputado popular Gonzalo Trenor López, a Xunta responde: «A súa execución avanza pero estivo moi condicionada por non contar cos permisos de ADIF e de Costas para actuar en zonas de afección da rede ferroviaria e de costas». Engádase que o permiso de ADIF «xa chegou» e por este motivo, «a obra se puido acelerar».
Na actualidade, os traballos céntranse xa no tramo entre a contorna da leira de Lourizán e as proximidades da depuradora de Vos Praceres.
Co novo ritmo que se imprime aos traballos, a Consellería de Vivenda reafirmouse no prazo inicial de inauguración deste itinerario, que é o ano 2026.
Por outra banda, a Xunta sinalou que o pasado xuño e referido tamén a Pontevedra déronse por concluídos os traballos iniciados en outubro do 2024 para a mellora da PO-531, ao seu paso pola parroquia de Campañó. Foi unha actuación que supuxo un desembolso de máis de 860.000 euros e contou cun prazo de execución de oito meses. O obxectivo desta actuación era «contribuír á mellora da seguridade, especialmente para os peóns».
Así mesmo, desde a Consellería de Vivenda sinalan que tamén en Pontevedra acabáronse dúas intervencións nas estradas PO-223 e PO-224 en Xeve, dotándoas dun itinerario peonil de 2,4 quilómetros. Desde a Xunta apuntaron que unha das consecuencias é «unha contorna escolar segura ao tempo que se facilitan os desprazamentos dos veciños tamén ao polígono empresarial».