O CIFP Montecelo de Pontevedra impulsa proxectos de FP Básica cun instituto italiano
PONTEVEDRA
O centro é desde hai anos un referente na atención a este alumnado pola súa capacidade para contactar con estudantes que viviron traxectorias educativas complexas
24 may 2025 . Actualizado á 05:00 h.Profesores do centro integrado de formación profesional (CIFP) Montecelo de Pontevedra acaban de viaxar a Arezzo, en Italia, para tecer alianzas cunha escola homóloga e levar a internacionalización á aula. Explican desde o equipo directivo que o obxectivo é impulsar proxectos colaborativos entre o alumnado de FP Básica de Galicia e Italia. O primeiro centro co que contactou o CIFP Montecelo é o Istituto Statale Tecnico Professionale Margaritone Vasari.
Sinalan desde o centro pontevedrés que se trata dun instituto que comparte visión e familias profesionais afíns. Cóntao Elena Lourido, profesora de ciclos básicos no CIFP Montecelo: «Este instituto gustounos moito porque traballan moi ben por proxectos. Chamounos especialmente a atención un proxecto que realizaron este curso creando de cero un Porsche a tamaño real de porexpan».
Nos últimos anos o CIFP Montecelo consolidouse como un referente na atención aos estudantes de FP Básica, especialmente pola súa capacidade para conectar con mozos que viviron traxectorias educativas complexas. Expono outro docente, José Vieites, que viaxou a Italia. «A través de metodoloxías activas, como a aprendizaxe baseada en proxectos, conséguese espertar o interese, a motivación e o sentimento de pertenza dun alumnado que necesita propostas pedagóxicas adaptadas á súa realidade», subliña. Pola súa experiencia, expón que hai moita diversidade de niveis e a motivación fluctúa bastante, polo que confían en que esta vía internacional engada un punto extras de interese á súa proposta educativa.
O director do CIFP Montecelo, Miguel Carballa, presume de que no seu centro non se deixa a ninguén atrás. Fai fincapé nas posibilidades que o paraugas do programa Erasmus + achega na procura de socios internacionais. «Iniciamos esa procura crendo firmemente que todos os estudantes, independentemente da súa traxectoria previa, merecen acceder a experiencias educativas transformadoras e inclusivas», recalca o máximo responsable do centro de FP situado en Montecelo, na parroquia de Mourente.