Pontevedra apenas rexistrou incidencias menores durante doce horas de apagamento

A electricidade caeu en Pontevedra, como no resto da Península, ás 12.32 horas do luns. O primeiro lugar do municipio onde se fixo de novo a luz foi a parroquia de Cerponzóns a iso das 22.30 horas. No centro superáronse as doce horas de apagamento, xa que ata a 1.13 do martes non se empezaron a acender algunhas dos farois da iluminación pública. A recuperación da enerxía foi paulatina ata as 4.38 horas.

A pesar de a situación excepcional que se viviu, a nota predominante foi ausencia de incidentes de gravidade. O alcalde, Miguel Anxo Fernández Lores (BNG), quixo destacar este martes o comportamento dos cidadáns e tamén o labor dos servizos municipais, con especial mención aos tres corpos de emerxencias —Policía Local, Bombeiros e Protección Civil— e do servizo de Informática, que traballaron denodadamente para garantir o funcionamento do Concello durante as horas críticas. Ademais, Lores destacou que estivo en contacto cos portavoces municipais, que se puxeron ao dispor do goberno local.

Os incidentes máis destacados producíronse durante as primeiras horas do apagamento, cando os Bombeiros tiveron que realizar ata nove intervencións para rescatar a persoas atrapadas en ascensores. Entre eles, un grupo de alumnos e unha profesora no colexio Calasancio, ou un rescate na comandancia da Garda Civil.

Efectivos de Bombeiros e de Protección Civil tamén colaboraron para subir a persoas con mobilidade reducida aos seus domicilios en pisos elevados, e na residencia de maiores Soremay.

Ademais, os Bombeiros tiveron que achicar auga na segunda planta do aparcadoiro do Mercado: ao non haber enerxía eléctrica pararon as máquinas de bombeo e chegouse a acumular un metro de auga.

Outra das intervencións dos Bombeiros foi para apagar un incendio que se produciu nun xerador no Parador de Turismo ao pouco de iniciarse o apagamento.

Na sede municipal constituíuse ás 17 horas do luns un comité de emerxencias do que formaban parte o Concello e a Subdelegación do Goberno. Unha das circunstancias que se puxeron sobre a mesa foi a imposibilidade dos cidadáns para porse en contacto cos servizos de emerxencias debido á caída dos servizos de telefonía, polo que para a noite se acordou sacar ao maior numero de efectivos á rúa.

Así dezanove patrullas —nove da Policía Local, seis da Local, dúas de Bombeiros e dous de Protección Civil— pasaron a noite percorrendo todo o municipio coas luces dos vehículos de emerxencias acesas para facerse ver. A medida era tanto para disuadir a posibles delincuentes como para facerse ver se algún cidadán precisaba axuda.

O sistema de abastecemento superou a súa proba mais difícil

Os servizos básicos de competencia municipal funcionaron con solvencia durante as horas que durou o apagamento. Desde o goberno local púxose especial énfase en destacar a fortaleza do servizo de abastecemento de auga, que permitiu garantir a subministración durante todo o incidente.

Os 25.000 metros cúbicos almacenados na planta potabilizadora de Lérez abondaban para garantir de subministración durante máis dous días —o consumo medio é duns 11.000 metros cúbicos diarios—, pero unha vez que se detectou a incidencia abriuse a captación do encoro do Pontillón de Castro, que non precisa de bombeos pois está nunha cota máis elevada. Así, mantívose a actividade na planta grazas a que se nutre de enerxía solar mediante placas fotovoltaicas.

Outra das fortalezas do servizo municipal de abastecemento deixouse sentir no hospital Montecelo. Hai uns anos entrou servizo o depósito de Castrosenín, en Mourente, que está máis elevado que o centro sanitario, polo que non precisa bombeos. Antes de dispor deste depósito, Montecelo nutríase do de San Mauro e necesita un bombeo, polo que nun caso como o do luns posiblemente quedouse sen auga.

Recollida de residuos

Outros servizos municipais funcionaron case con normalidade. Houbo recollida de residuos ata as 0.30 horas, cando a planta de transferencia de Ribadumia deixou de funcionar; e recuperouse o servizo ás 6 da mañá do martes, segundo indicou o alcalde.

---

---

---