Luis López traslada aos concellos de Pontevedra os avances para incrementar a recadación do IBI da AP-9

Este xoves, o presidente da Deputación de Pontevedra, Luis López, trasladará aos alcaldes dos concellos polos que discorre o trazado da autoestrada AP-9 «os avances conseguidos polo goberno provincial para incrementar a recadación dunha ducia de concellos». Trátase de concellos que teñen delegado no ORAL a recadación tributaria do IBI: Barro, Caldas, Meis, Moaña, Mos, Poio, Pontecesures, O Porriño, Portas, Tui, Valga e Vilaboa.

Precisaron que, a través do Servizo de Xestión Tributaria, levan meses traballando para conseguir que os concellos reciban os fondos que lles corresponden despois de que expirase no 2023 a bonificación do 95% da que se viña beneficiando a concesionaria.

Neste sentido, lembraron que Luis López, en maio do 2024, avanzou que se estaba «traballando para incrementar a recadación dos concellos polos que pasa a AP-9», polo que, cando aínda non pasou un ano, ten previsto trasladar aos rexedores «aváncesvos conseguidos». Así mesmo, remarcaron que «desde a Deputación se segue con moita atención todos os acontecementos que rodean á AP-9. Así, ademais do apoio do ORAL e dos servizos xurídicos para que os concellos recaden o que lle corresponden, tamén seguen a coordinar reclamacións como a gratuidade da autoestrada para treitos como o comprendido entre Pontevedra e Curro, o desbloqueo do debate no Congreso para traspasar a titularidade a Galicia ou a conxelación das subas das peaxes».

---

---

---