Caldas impulsa a constitución dunha mesa para defender a sanidade pública
PONTEVEDRA
Integrarase na plataforma SOS Sanidade Pública e levará a cabo unha recollida de firmas para fortalecer a atención primaria en Galicia
23 novs 2022 . Actualizado ás 05:00 h.O pasado domingo Caldas de Reis celebrou unha manifestación para reclamar melloras na atención sanitaria, convocada polo BNG, e este martes o Concello impulsou a constitución dunha mesa para a defensa da sanidade pública no municipio. Segundo informou o goberno local, a iniciativa desa mesa parte do alcalde, Juan Manuel Rey (PSOE), que convocou pola tarde unha reunión no salón de plenos da casa consistorial. A esa cita estaban convocados representantes de todo o tecido asociativo do municipio, así como partidos políticos e organizacións sindicais.
Segundo avanzou o rexedor, esta iniciativa recolle unha demanda social da cidadanía de Caldas, «que quere dispor dunha plataforma cívica para canalizar as reclamacións en defensa dunha sanidade pública co financiamento adecuado para a atención primaria e coa dotación suficiente do persoal sanitario». No encontro estaba prevista a integración da nova mesa na plataforma SOS Sanidade Pública e o inicio dunha recollida de firmas para apoiar a iniciativa lexislativa popular (ILP) que pide salvar e fortalecer a atención primaria en toda Galicia.
Desde o Concello adiantaron que se valorarán outras accións como a colocación dunha carpa en lugares públicos para esa recollida de firmas e a convocatoria de concentracións diante do centro de saúde para esixir persoal médico, consultas presenciais, medidas urxentes para reducir as listas de espera, e PAC aberto con dotación de persoal médico. Rey , que está disposto a botar un pulso ao Sergas, insiste en que é unha reivindicación «xusta e innegociable».