Os municipios con restricións covid pasan de 15 a 19 en Pontevedra e O Salnés
PONTEVEDRA
Os casos activos soben a 3.041 na área sanitaria, con 167 novos contagios
29 jul 2021 . Actualizado ás 05:00 h.O conselleiro de Sanidade, Julio García Comesaña, facía públicos onte os cambios no mapa de restricións covid de Galicia tras a reunión do comité clínico do martes. A área sanitaria de Pontevedra e O Salnés, que é das sete galegas a que aínda presenta a maior incidencia acumulada a 14 e a 7 días, vese afectada. Con respecto ás restricións vixentes, os municipios en nivel máximo, alto ou medio pasan de 15 a 19. A modificación farase efectiva este sábado, ás 0 horas.
En nivel máximo seguirán, desde o día 31 de xullo, os catro concellos que xa estaban: Sanxenxo, O Grove, Cambados e Meaño. Ao nivel alto, onde figuraban e mantéñense Pontevedra, Poio, Marín, Vilagarcía, Vilanova e A Illa, incorpóranse cinco concellos que han ir incrementando a súa incidencia nos últimos días: Bueu, Meis, Ponte Caldelas, Ribadumia e Soutomaior. Destes cinco, todos menos Soutomaior permanecían ata agora en nivel medio.
Finalmente, tres municipios pasan a nivel medio. Trátase de Barro , A Lama e Vilaboa, e nese rango manterase Caldas de Reis. Que implican eses niveis de restrición? En nivel máximo e alto o lecer nocturno está pechado no interior e esíxese unha proba de inmunidade para acceder ao interior dos bares e restaurantes, en concreto, un test de antígenos negativo, o certificado completo de vacinación ou o ter pasado a enfermidade. Ademais, en nivel máximo a capacidade é do 30 % no interior e do 50 % no exterior. En nivel alto, as condicións son as mesmas, pero a capacidade é do 50 % tanto no interior como no exterior dos locais. Ademais, entre a 1 e as 6 horas están prohibidas as reunións na rúa. En nivel medio, o lecer nocturno está aberto -esixindo igualmente unha proba de inmunidade- e as capacidades na hostalería son do 50 % tanto dentro dos establecementos como nas terrazas. A prohibición de reunións na rúa está vixente entre as 3 e as 6 horas. En todos os niveis o límite de persoas que poden reunirse ao aire libre é de 10, sendo de 6 no interior.
Ponte Caldelas é un dos concellos que sobe a nivel alto. Como medida preventiva e como xa intuían pola alza das infeccións, o goberno local acordou o martes suspender todas as actividades previstas a fin de semana, aínda que eran ao aire libre. «É imprescindible limitar a interacción social para cortar a cadea de contaxios», subliñou o seu alcalde, Andrés Díaz (PSOE).
35 días de incremento
Nova xornada de subida de casos activos de covid en Pontevedra e O Salnés. Van xa 35 consecutivas. No entanto, o ritmo das altas epidemiolóxicas modera o incremento das infeccións. Segundo o informe do Sergas de onte, no territorio hai 3.041 casos activos. Son 17 máis que os reportados o martes e nas últimas 24 horas déronse 150 altas, o que se traduce en 167 novos contagios nun día no que se fixeron máis de mil probas PCR (1.006).
En canto ás persoas contaxiadas que necesitan hospitalización, son 35 as ingresadas, unha máis. Trátase a 30 pacientes en planta de tres centros (22 en Montecelo, 6 no Salnés e 2 no privado Quironsalud) e a 5 graves en unidades de críticos do principal hospital do Chop. O resto de contaxiados, 3.006, presentan síntomas leves da enfermidade ou son asintomáticos, polo que deben gardar illamento nos seus domicilios baixo seguimento de persoal de atención primaria. Os curados que superaron a enfermidade desde o inicio da pandemia son 15.426, mentres que o virus se levou por diante a vida de 182 persoas.
Empeza a vacinación do grupo de idade de 29 a 20 anos
A vacinación contra o covid nos menores de 30 anos iníciase este xoves na área sanitaria de Pontevedra e O Salnés. Os mozos que xa recibiran as picadas eran Erasmus que usaron o sistema de autocita. No recinto feiral de Pontevedra están convocados hoxe 4.124 persoas do grupo de idade de 29 a 20 anos para recibir a primeira dose do soro de Pfizer. No recinto de Fexdega, en Vilagarcía, son 1.038 os citados, da mesma franxa de idade e tamén con Pfizer. A área de saúde de Santiago foi a primeira de Galicia en comezar a inmunizar aos menores de 30 anos. Precisamente, de 12 a 29 anos é onde se rexistra a incidencia covid máis alta.
En Pontevedra e O Salnés, ata o día 27 de xullo as persoas que xa teñen a pauta completa de vacinación son 179.979, o que representa un 65,56 % da poboación do territorio maior de 12 anos. Hai ademais outras 24.022 que recibiron polo menos unha dose, un 8,75 %.