O Goberno central financiará os traballos
03 jul 2021 . Actualizado ás 05:00 h.O delegado do Goberno en Galicia, José Miñones, anunciou este venres que, por primeira vez, o Goberno central financiará a exhumación de dúas fosas comúns do franquismo localizadas en Galicia, concretamente as situadas no concello pontevedrés de Cerdedo-Cotobade e no coruñés do Pino. Esta iniciativa busca identificar e, ao mesmo tempo, dignificar a persoas desaparecidas durante a Guerra Civil e a ditadura posterior cunha primeira achega de 106.395,08 euros á Xunta. Miñones insistiu en que «é a primeira vez que un goberno habilita axudas directas ás comunidades autónomas» para este tipo de actuacións.
O Boletín Oficial do Estado deste venres formalizou a transferencia á Administración autonómica desta partida. A Xunta, pola súa banda, «deberá desenvolver estes traballos nos próximos meses». En concreto, actuarase sobre a fosa común do cemiterio de Tenorio, «onde se estima a existencia de once vítimas», así como na situada no lugar de Amenal , no Pino, onde se cre que hai tres vítimas.
A axuda «contempla a creación dun grupo multidisciplinar coa participación de historiadores, forenses, arqueólogos e outros especialistas para executar estas tarefas e dignificar vítimas e lugares».
Trátase dun financiamento que se acordou en marzo na primeira conferencia sectorial de Memoria Democrática, presidida pola vicepresidenta primeira do Goberno, Carmen Calvo. No marco deste encontro presentaron as liñas de traballo, así como as axudas directas.
A repartición dos 106.395,08 enmárcase dentro do Plan Cuatrienal 2020-2024, que pretende dar resposta ás recomendacións dirixidas a España polos principais organismos internacionais de Dereitos Humanos, «co fin de impulsar de forma decidida as políticas de Memoria Democrática, especialmente no relativo á procura, e identificación de persoas desaparecidas durante a Guerra Civil e a posterior ditadura».
Sen axudas desde o 2013
Esta iniciativa compleméntase cun plan de choque que o Ministerio da Presidencia puxo en marcha durante o pasado ano con carácter transitorio para paliar a falta de recursos económicos para as políticas de Memoria Democrática, debido á ausencia de subvencións gobernamentais desde o 2013.