O corpo atopouse pouco antes da unha dentro da auga nun tanque utilizado polos servizos de extinción de incendios
16 feb 2025 . Actualizado á 15:57 h.Un veciño de Vilardevós de 73 anos foi atopado morto esta mañá nun estanque de auga no municipio ourensán. Dez minutos antes da unha da tarde, o 112 recibiu unha chamada dun particular que indicaba que achara a unha persoa falecida nun estanque en Vilardevós e que ao lado había un coche. O estanque, un depósito utilizado para que os medios de extinción de incendios carguen auga, atópase situado na estrada de Riós, a pouco máis de dous quilómetros de Vilardevós, onde residía o falecido.
Ata o lugar desprazáronse sanitarios do 061, que sacaron da auga o corpo do xa falecido, a Garda Civil e voluntarios da agrupación local de Protección Civil. Tamén se deu aviso aos bombeiros de Verín, aínda que non tiveron que ir posto que o cadáver se atopaba nun lugar accesible. Tamén acudiu o forense e será a autopsia a que determine as causas da morte.