O peón ía vestido de escuro e non levaba ningunha peza reflectora. O condutor do turismo deu negativo en alcol e drogas
01 may 2025 . Actualizado á 10:45 h.Un home de 80 anos morreu na noite do mércores tras ser atropelado por un vehículo en estrada OU-531, que comunica os municipios de Xinzo e Cortegada, á altura do termo municipal de Sandiás.
Segundo transcendeu o peón ía vestido totalmente de escuro e non facía uso de ningunha peza reflectora cando foi arroiado por un todo terreo, en concreto un Suzuki Gran Vitara. Foi o propio condutor do vehículo o que, tras deterse e comprobar como se atopaba o ferido, alertou enseguida ao 112. Nese momento xa explicou que se trataba dun home de avanzada idade que se atopaba inconsciente.
Desde o 112 Galicia solicitouse a colaboración do persoal de emerxencias sanitarias de Galicia-061 e da Garda Civil de Tráfico. Ao mesmo tempo informouse ao departamento de Bombeiros de Xinzo, aos voluntarios de Protección Civil de Sandiás e aos servizos de mantemento de estradas. Nada máis chegar ao lugar os sanitarios xa comprobaron que o home se atopaba sen vida. Pola súa banda, os axentes do instituto armado realizáronlle as probas de alcol e drogas ao condutor do todo terreo, que deu negativo en todo.
Aínda que de momento se investigan as causas do sinistro, ao parecer o peón podería ir camiñando polo interior do carril de circulación, motivo polo cal o condutor non tivo tempo de esquivalo e arroiouno. Comprobouse que non facía uso dos chalecos reflectores en cuxa utilización tanto se insiste por parte das autoridades de tráfico da provincia, sobre todo cos colectivos máis vulnerables, como as persoas maiores.
En calquera caso, os integrantes do equipo de investigación da Garda Civil de Tráfico de Verín instrúen dilixencias para aclarar o ocorrido. Tras o tráxico accidente, tomaron declaración ao condutor do coche e fixeron as medicións oportunas para esclarecelo.