O alcalde de San Xoán de Río, elixido entre os 100 líderes máis innovadores do mundo iberoamericano

O alcalde de San Xoán de Río e deputado provincial, Xosé Miguel Pérez Blecua, foi recoñecido como un dos 100 líderes máis innovadores do mundo iberoamericano no Ránking Top100 Líderes Innovadores 2025. Esta listaxe, impulsado pola Rede Business Market en colaboración coa Asociación Internacional de Startups e medios latinoamericanos, distingue ás figuras máis destacadas na promoción da innovación e o emprendemento. 

O galardón, outorgado na categoría de Impacto Social e Emprendemento, premia a súa traxectoria como referente en innovación rural, desenvolvemento sostible e atracción de talento mozo ao medio rural. A organización destaca o seu papel como impulsor da primeira Startup Village de España, unha iniciativa pioneira situada no Val de Navea (San Xoán de Río e A Pobra de Trives), enfocada no emprendemento rural de baixo impacto, a innovación inclusiva e a creación de oportunidades para a mocidade.

Tamén se recoñeceu a súa implicación na New European Bauhaus, promovendo criterios de sustentabilidade, inclusión e beleza na revitalización do rural galego, así como a súa participación activa en redes europeas de cooperación como Rural EU, dedicadas ao emprendemento xuvenil, a economía social e a innovación territorial.

«Este recoñecemento non é só persoal, senón colectivo», afirmou Pérez Blecua. E engadiu: «Supon poñer en valor todo o traballo que estamos facendo desde o rural»”. Segundo o rexedor, este premio demostra que os pequenos municipios tamén poden ser laboratorios de futuro, con capacidade de transformar realidades e atraer proxectos de vida e innovación.

O galardón será entregado o próximo mes de setembro nunha gala internacional que se celebrará en Guayaquil (Ecuador), onde se reunirán os outros 99 líderes seleccionados nesta edición, procedentes de máis de 12 países.

---

---

---