San Xoán de Río quere desenvolver un proxecto de depuración de augas creando humidais artificiais

O alcalde de San Xoán de Río, José Miguel Pérez, entrevistouse esta semana coa conselleira de Medio Ambiente e Cambio Climático, Ángeles Vázquez, para testar se a Xunta prestará apoio a un proxecto de depuración de augas residuais e pluviais mediante a creación de humidais artificiais. O rexedor explicou á responsable do departamento autonómico as vantaxes deste tipo de sistemas, destacando que supoñen unha solución idónea para desenvolver en pequenos núcleos. Entre elas, que son sinxelos de manexar, producen moi baixos niveis de lodo e non necesitan consumo eléctrico, ademais de ser un método respectuoso co medio xa que non se utilizan produtos químicos.

José Miguel Pérez volveuse da reunión coa promesa da conselleira de que se estudará a viabilidade do proxecto e a posibilidade de colaboración da Xunta. A institución municipal aínda terá que enviar o plan pormenorizado coas actuacións concretas previstas para que o revisen os equipos técnicos, pero Ángeles Vázquez destacou que se trata dunha boa iniciativa que, segundo o proxecto municipal, servirá para mellorar a depuración e o saneamento en pequenos núcleos deste concello de montaña como San Miguel, Outeiro, A Burata ou Fitoiro. Vázquez lembrou que a súa consellería ten como un dos obxectivos primordiais prestar apoio técnico a todos os concellos nas iniciativas que poñan en marcha para mellorar os servizos da súa competencia como é o caso do saneamento e abastecemento de augas.

No encontro, o alcalde de San Xoán de Río tamén explicou á conselleira os obxectivos nos que se está traballando desde o grupo que municipios galegos que ostentan o título de Capital Española das Montañas. Unha distinción que o Concello de San Xoán de Río ostenta xunto con Manzaneda, Chandrexa de Queixa e A Pobra de Trives.

---

---

---