Os comerciantes de Ribadavia poderán ter máis porcentaxe de axuda por estar en Vilas Vivas
RIBADAVIA
A Xunta explicoulles as liñas de subvencións para modernizar o comercio que sairán en xaneiro do 2026
13 dic 2025 . Actualizado á 05:00 h.Os comerciantes de Ribadavia coñeceron os detalles do Programa de Impulso á Innovación e Sostibilidade do Comercio Local e Artesanal, que a Xunta prevé pór en marcha en xaneiro do 2026 cunha dotación de 3.900.000 euros. O director xeral de Comercio, Gabriel Alén, acompañado polo alcalde, César Fernández, e por outros representantes de asociacións empresariais presentaron aos ribadavienses as liñas deste programa. Son tres e a elas poderán acceder tanto comerciantes como artesáns. Haberá subvencións para innovación e dixitalización, para modernización e eficiencia enerxética ou para sustentabilidade ambiental, con axudas de cen euros para a adquisición de bolsas elaboradas con materiais vexetais para un empaquetado máis ecolóxico.
Os representantes políticos informaron os comerciantes de que en Ribadavia, por estar adherida ao programa Vilas Vivas, hai vantaxes engadidas. Así, os establecementos que cumpran as condicións, estean ou non no centro histórico, poderán cubrir ata o 90% do investimento total, porcentaxe superior aos concellos non adscritos.