A alcaldesa, Isabel Gil, afirma que coñeceu o problema este luns e que a culpa é dun transformador de Fenosa
08 nov 2023 . Actualizado á 05:00 h.Desde o pasado xoves están sen luz pública. Non é a primeira vez que os veciños das parroquias de Pazos e Paizás, no concello de Ramirás, sofren a falta de subministración. Con todo, nunca fora durante tantos días. Son ao redor de trinta veciños, a maior parte moi maiores, que pasadas as seis e media da tarde xa non saen de casa. Dálles medo.
«Esto é unha tristura, dá medo saír fóra da casa de noite», afirma Blanca Nieves Peteiro Méndez. Ela ten 59 anos e explica, por exemplo, que cando chega de traballar cústalle entrar no garaxe, xa que todo está escuro e xa non se lle ocorre saír á terraza ou a pasear. «Cando chego teño que entrar cos focos do coche e os deixo acendidos ata que abro as portas da casa e prendo as luces. A verdade é que queiras ou non vives con medo», subliña. Segundo explican os veciños, esta situación vénse repetindo desde hai meses. «As luces de fóra, as públicas, vanse de vez en cando. Pero tamén temos un problema coas da casa. Neste caso falamos con Fenosa pero non arranxa o tema», explica Blanca Nieves.
Os veciños explican que a falta de luz pública púxose en coñecemento do Concello sen que obtivesen ningunha resposta.
A alcaldesa de Ramirás, Isabel Gil, sinalaba este martes que non soubo da incidencia ata o luns pola noite. «Esta semana tivemos temporal e o técnico do concello tivo que percorrer diferentes aldeas, non dá abasto», afirma para explicar a demora. Sobre os continuos cortes, sinala que o mal funcionamento das instalacións de Fenosa afectan a iluminación público. «Cando saltan esas, apáganse as públicas. É un problema de Fenosa», subliña.