Esta iniciativa conta con 29 puntos de recollida en Santiago
04 dic 2020 . Actualizado ás 05:00 h.A iniciativa Tropaverde, que promove a recollida de residuos en Santiago, implica a 3.901 persoas e 138 empresas e establecementos colaboradoras na reciclaxe, para favorecer o coidado do medio ambiente. Os participantes poden levar residuos a 29 puntos de recollida. Pola súa achega entréganlles un cheque con estrelas (puntos) que lles permiten acceder a produtos ou descontos nos comercios adheridos. E, en ocasións, a entradas para actividades culturais ou deportivas. Desde que comezou, no 2015, repartiu 14.380 cheques, segundo un balance de setembro, para presentar nun encontro europeo.
O Concello de Santiago e a empresa Teimas promoven este proxecto, que experimenta tamén restricións pola pandemia do covid-19, aínda que continúa activo. A web www.tropaverde.org informa de todos os detalles. As persoas interesadas poden entregar os seus residuos nos puntos limpos do Polígono do Tambre e de Piñor, ou no punto limpo móbil: pilas, fluorescentes, aerosois, aceites de uso doméstico e automoción, baterías, radiografías, televisores, pantallas de computador, botes e envases diversos. En Piñor e o Tambre admiten ademais electrodomésticos de maior tamaño, mobles, colchóns, restos de podas e outros máis voluminosos. Nos centros socioculturais hai máis limitacións: a maioría recollen pilas e aceite de cociña usado. Tamén algunhas tendas de electrodomésticos recollen produtos; e a Asociación para a Defensa Ecolóxica de Galicia (Adega), roupa usada; ou a Escola de Artes Mestre Mateo, pilas, papel e cartón.
Tropaverde participa desde abril do 2018 no Programa Europeo Urbact III. Comezou cun municipio húngaro e outro grego, onde replicaron iniciativas semellantes. Nunha segunda fase, desde decembro do 2018, ampliada por mor da pandemia, sumáronse Guimarães (Portugal), Niza (Francia) e Opolska (Polonia), e prevese que finalice nesta última en xuño do 2021.
Centro de Santa Marta
O 78 % dos cheques de Tropaverde para intercambiar por recompensas entregáronse en centros socioculturais, e o 16 %, en puntos limpos. Destacan os centros socioculturais de Santa Marta, con 3.719 cheques; Vite, 1.581; O Castiñeiriño, 1.444; O Ensanche, 1.265; e Conxo, con 908. A directora do centro sociocultural de Santa Marta, Sandra Quintana, afirma que lles levan residuos para reciclar «as persoas usuarias habituais das nosas actividades, biblioteca ou que buscan acompañamento. Desde que comezou a pandemia da covid só recollemos aceite de cociña usado e pilas. Antes tamén nos traían tapóns, papel e cartón; ou tóneres, tintas e produtos para impresoras, e deixamos de recoller estes produtos», explica.
Tropaverde tamén incentiva con campañas a separación de residuos ou a reciclaxe. Destacan Reciclar na escola ten premio, con 2.416 participantes, que achegaron 2.356 litros de aceite de cociña usado ou 3.229 aparellos eléctricos e electrónicos; ou Longa vida aos teus aparellos electrónicos, en colaboración coa firma de xestión de residuos Revertia na que colleron máis de 2.500 quilos entre computadores, baterías e outros.