O motorista de 69 anos que morreu en Petín regresara ao seu pobo natal despois de toda unha vida traballando en Suíza
PETÍN
O home saíuse da vía e chocou contra o muro dunha casa. Levaba posto o casco pero non llo colocou ben e perdeuno no impacto
27 dic 2023 . Actualizado ás 19:46 h.Semana negra nas estradas ourensás, coa terceira vítima mortal por accidente de tráfico en só cinco días. Nesta ocasión, foi un motociclista de 69 anos o que perdeu a vida cando circulaba pola travesía da OU-134, que comunica A Portela con Portomourisco, no concello ourensán de Petín .
O motorista ía só a bordo dunha Honda de 125 CC cando se saíu da vía pola marxe esquerda, por causas que se investigan, e chocou contra o muro dunha vivenda. O sinistro tivo lugar no punto quilométrico 3,800 do devandito viario, na Portela, ás 14.55 horas.
O falecido residía en Portomourisco(Petín), a súa localidade natal, á que regresara tras xubilarse despois de toda unha vida de traballo en Suíza. José Manuel Fariñas, alcumado Fotos, como o seu pai, que se dedicaba a facer fotografías percorrendo os pobos en moto, era moi coñecido en Petín e na Rúa. O accidente ocorreu preto do seu domicilio, na baixada da Portela a Portodemouros.
Foi un veciño quen se atopou o corpo do condutor falecido. Estaba ao lado da moto e sen casco, segundo informou a Garda Civil. A Unidade de Investigación de Sinistros Viarios, do Subsector de Tráfico do instituto armado en Ourense, está a investigar xa as causas posibles de accidente, que deixa a vítima mortal número 23 en estradas interurbanas da provincia no que vai de ano. Segundo precisaron posteriormente, o malogrado motorista si levaba posto o casco mentres circulaba, pero non llo colocou ben e se lle desabrochó e desprendeu cando se produciu o impacto contra o peche da casa.
Só nos últimos días han falecido tres persoas en vías de Ourense. O sábado 23 morría un home de 91 anos, que ía como pasaxeiro do vehículo contra o que impactou outro. Sucedeu en Coles, na N-525. Este martes, día 26, perdía a vida un condutor de Zamora. Circulaba en sentido contrario pola autovía. No que vai de mes de decembro, houbo dous accidentes mortais máis, un en Xinzo e outro en Cortegada.