Denunciado en Ourense un condutor que deu positivo en alcol tras fuxir dun accidente que provocou ao saltarse un stop
OURENSE CIDADE
O sospeitoso admitiu os feitos tras ser interceptado grazas a un dispositivo no que colaboraron axentes de Policía Local e Garda Civil
17 oct 2023 . Actualizado ás 05:00 h.Unha operación desenvolvida de forma conxunta entre axentes da Garda Civil e da Policía Local de Ourense permitiu localizar a un condutor que fuxiu tras ter protagonizado un accidente de tráfico.
O suceso ocorreu o pasado luns. Na central de comunicacións do instituto armado tívose coñecemento dun choque entre dous vehículos no lugar do Picouto (Ramirás). A persoa que deu o aviso informou de que unha furgoneta non respectara un sinal de stop e chocara contra outro turismo. Esta persoa tamén explicaba que o condutor se deu á fuga, polo que de inmediato se puxo en marcha un dispositivo para localizalo. Pouco despois se soubo que o individuo estaba nun negocio de alugueiro de vehículos próximo a Ourense e que pretendía coller un bus urbano que o levase ata o centro da capital, polo que a Garda Civil pediu axuda á Policía Local para interceptalo. Pillárono en Seixalbo, desde onde foi trasladado ás dependencias do cuartel de Santa Mariña. Alí fixéronlle as probas de alcoholemia, nas que guindou un resultado positivo. O sospeitoso admitiu ter sido o causante do accidente, que agora lle suporá varias denuncias administrativas. Unha por non respectar o sinal, outra por non identificarse tras a colisión, e a terceira por circular ebrio.