A asociación aposta polo folclore galego recuperando as clases de baile este curso
13 oct 2023 . Actualizado á 05:00 h.A Coral de Ruada acaba de arrincar o curso escolar con ensaios e actuacións. Este ano suma á súa proposta cultural en Ourense unha novidade. A coral recupera escola de danza, unha actividade que abandonou hai máis de sete décadas. O grupo diríxeo Ismael Rodríguez (Ramirás, 2001), que é ademais o profesor das clases. «Levo bailando dende os tres anos e formo parte do grupo Rebulir dende fai vinte», admite. A Ismael o folclore galego córrelle polas veas e non o oculta. Agora encara a dirección desta parte da Coral de Ruada con moitas ganas. «Sinceramente faime moitísima ilusión. Penso que é un proxecto bonitísimo e para min formar parte desta agrupación, tan emblemática en Ourense, é xa toda unha sorte», confesa.
Na escola de danza hai apuntadas xa máis de trinta persoas, que están divididas en dous grupos. Un é de iniciación, pensado para xente que nunca bailou. «Logo hai outro grupo para os que si tiveron contacto algunha vez co baile tradicional», explica Ismael. Os primeiros ensaian os xoves de 19.00 a 20.00 horas e os segundos, de 21.00 a 22.00. As clases custan dez euros ao mes e aínda hai prazas dispoñibles.
Entre os alumnos hai quen nunca pisaron unha pista de baile pero levan o folclore dentro e quen directamente se animan con todo. «Gústame moitísimo a cultura galega e apúntome a todo o que supón profundar en ela», afirma Felicia García, que tamén é alumna do grupo de pandereita da Coral de Ruada. Ela naceu en Venezuela e chegou a Ourense hai seis anos co seu marido, fillo de emigrantes retornados. «Mesmo me gustaría aprender galego, algo que escoito moito na coral», engade.
O ourensán Rolando Rodríguez é outro dos alumnos da nova escola de danza e estivo presente xa no primeiro dos ensaios, que se desenvolven no espazo que ten a Coral de Ruada no Teatro Principal, na terceira planta. «A min non me da vergoña nin bailar nin cantar», afirma. El é un dos coralistas da agrupación e, ás súas máis de setenta anos, cando lle comentaron que ían reactivar as clases de danza, non dubidou nin un segundo en apuntarse. Tamén toca a guitarra. «Empecei a cantar con tres anos e de neno facíao todo o tempo, mentres ía coas vacas ao monte», di este veciño de Vos Peares. «A música ten maxia. Eu podo vir amargado nun mal día, que en canto abro a porta e escóitoa sonar, empézame a ferver a sangue e non o podo aguantar», admite Rolando.