O grupo show do Aehde liderou a súa categoría no Trofeo Internacional Cidade de Vigo

O grupo show do Club Aehde O Carballiño está a asinar unha excelente tempada e sumou un novo éxito ao gañar na súa categoría do Trofeo Internacional Cidade de Vigo, unha das citas de referencia do noroeste peninsular.

A coreografía O templo do pobo obtivo unha puntuación do xurado de 20,53 puntos, un punto e medio máis que o segundo clasificado. É unha idea de Nerea Estévez, adestradora do grupo show do club carballiñés, que conseguiu co seu traballo que a entidade non se baixase do podio en todos os campionatos e torneos nos últimos tres anos.

As deportistas do Aehde pecharán a tempada o vindeiro domingo coa súa participación na Copa de Galicia de show que se celebrará no Porriño e, a continuación, iniciarán un novo e ilusionante proxecto na modalidade por equipos da patinaxe artística.

---

---

---