As obras participantes exporanse na casa grande de Viloira
24 oct 2025 . Actualizado á 05:00 h.O Instituto de Estudos Valdeorreses convocou a segunda edición do seu concurso de espantallo, baixo o lema Vos gardiáns dás hortas. «Preténdese poñer en valor unha figura fundamental do rural galego, que podemos ver ao longo da nosa xeografía en calquera horta ou explotación agrícola. Un elemento que en moitas ocasións nos sorprende pola gran orixinalidade coa que os seus autores a decoran. Tanto os particulares coma os profesionais», explicou o presidente do IEV, Aurelio Blanco Trincado.
As persoas interesadas en participar teñen ata o 25 de febreiro para presentar as súas obras. Deberán ter un tamaño comprendido entre un metro e dous metros de altura. As tres mellores creacións seleccionadas polo xurado recibirán premios de 500, 300 e 200 euros, respectivamente.
Organizarase unha exposición con todos os espantallos participantes, que poderá verse nos xardíns da casa grande de Viloira, en barco. Posteriormente, as figuras instalaranse ao longo do Camiño de Inverno ao seu paso pola comarca.
«Presentaremos esta iniciativa aos colexios e institutos valdeorreses, para incentivar a participación dos seus alumnos e profesores», avanzou Julio Pérez, membro da directiva do IEV. Creouse unha categoría para nenos de entre 5 e 10 anos, que deberán crear espantallos de entre 30 e 50 centímetros.