Pardellas volve aspirar á alcaldía de Melón tras cumprir a súa inhabilitación
26 feb 2023 . Actualizado á 21:59 h.O Partido Popular presentou onte aos seus candidatos á alcaldía dos concellos da provincia de Ourense. Estaban case todos, pero non todos. Uns non foron porque estaban de viaxe, por asuntos persoais ou porque a neve llo impediu. E outros non acudiron a Santiago porque aínda non está pechado quen ocupará ese posto nas eleccións de maio, como é o caso da Teixeira. Miguel A. Cid, de baixa médica, non ten decidido se repetirá. A listaxe aínda está por pechar e desde a executiva provincial pospuxeron facelo público ata dentro duns días.
Aínda así, moitas foron os candidatos presentes no acto. E na maioría dos casos repiten os mesmos que foron nos carteis electorais hai catro anos. Ao redor do 20% serán diferentes a entón e entre eses hai varios que non serán caras novas. Como Alberto Pardellas en Melón. O exalcalde volve á primeira liña tras pasar os oito anos e medio que estivo inhabilitado por prevaricar. Substitúe no cartel á súa muller, Cristina de Francisco, que foi a candidata o tempo que el non puido estar en política. Tamén será renovación no cartel electoral Julio Temes por Nogueira de Ramuín, aínda que o actual alcalde xa o fora antes.
Varios das novas caras no cartel son actualmente rexedores tras dimitir aqueles que encabezaron a lista no seu momento, como Rebeca Sotelo en Cenlle, Eva Barrio en Riós ou Manuel Pérez en Paderne de Allariz. E no grupo de alcaldes que intentarán repetir está tamén Xosé Miguel Pérez Blecua. Ostenta o bastón de mando de San Xoán de Río desde o 2019, cando se presentou encabezando unha candidatura independente. Tempo despois, fichou polo PP. «Seguirei gobernando como independente ata as eleccións», di. Agora que está confirmado como candidato, a súa folla de ruta pasa por reunir á agrupación RÍO, que liderou hai catro anos. «Quen queira vir para o PP, que veña, ou incluso se hai quen queira vir na lista pero independente, tamén; cada un que elixa onde quere estar», avanza. Despois reunirase «coa xente do PP». Non fala de afiliados, di, porque cre que é o único que queda en Río. «A xente que había deixou de pagar as cotas cando ficharon a Luis Castro», remarca. O presidente provincial do PP, José Manuel Baltar, fichou ao entón rexedor do PSOE a uns meses das eleccións.
Outros candidatos xa son concelleiros desde hai tempo, como Roberto González na Pobra de Trives (e portavoz tras a dimisión da anterior cabeza de lista, Domingo Diéguez, pouco despois de iniciado o mandato), Marta Nóvoa en San Cibrao das Viñas, Finamor Fernández en Parada de Sil (Yolanda Jácome non repetirá tras ser fichada polo PP hai catro anos, cando aínda era a alcaldesa do PSOE) e Antonio López no Bolo (que buscará conservar o bastón de mando de Manuel Corzo); ou con experiencia en política, como Nacho Campo, o candidato de Maside, que é tamén o presidente de Novas Xeracións. Moita ten tamén Pablo Pérez, fillo do alcalde de Quintela de Leirado (que tamén repite), edil e deputado provincial. Loitará por facerse coa alcaldía de Celanova.
Hai tamén quen supón unha renovación total, de quen dá o paso por primeira vez para entrar na vida pública. É o caso de Fernando Taboada, que será o aspirante en Beade. Hai catro anos encabezou a lista Senén Pousa, que xa anunciou que liderará unha candidatura propia tras ser excluído do PP. Taboada irá como independente. «Xente da vila decidimos facer unha candidatura porque era unha necesidade, había que facer algo. Beade está ingobernado desde fai unha lexislatura e media. Nós tiñamos lista e o PP buscaba unha, e coincidimos», sinala. Tamén é novo Marco Carballal, que busca conservar o bastón de mando de Montederramo que ostenta Antonio Rodríguez, que o deixa. Rodríguez apela á súa idade, ten 70 anos, para dar un paso ao carón. «Levo desde o 1988 e xa está ben. Quero desfrutar da familia o tempo que me quede», sinala. Carballal apela á súa, ten 23 anos e é o candidato do PP máis mozo da provincia, para anunciar un cambio. «Xa iba na lista hai catro anos e agora dou o paso por tirar pola vila», sinala. Implicado na organización de actividades culturais, infantís e de lecer, agora quere darlle un aire novo a Montederramo. «Estou traballando coa xente para darlle un cambio, que a xente vexa que non é mesmo, que hai renovación», avanza.
Son caras novas que se presentaron onte en Santiago, nun acto no que estaban outros nomes xa anunciados polo PP, como Manuel Cabezas en Ourense, Lino González no Carballiño, Lara da Silva en Verín, Remedios Cid en Vilar de Santos e Adriana Álvarez en Vilardevós. Haberá tamén renovación en Baños de Molgas e Vilar de Barrio. Noutros concellos aínda hai incógnita sobre o nome.
O acto de Santiago serviu tamén para confirmar a alcaldes e portavoces da oposición que continuarán lideraron a lista, pero que o partido todavia non referendara publicamente. É o caso de Álvaro Fernández na Rúa de Valdeorras, Chelo Vispo en Barbadás, Luz Doporto en Allariz ou Antonio Fernández en Xinzo de Limia.
Recuperan a un edil de Julio Gurriarán para enfrontarse a Alfredo García no Barco
Será a primeira vez que a súa cara vaia nun cartel electoral, pero Manuel Núñez, Noli, está lonxe de ser novo en política. O candidato do Partido Popular xa foi concelleiro durante oito anos no Barco de Valdeorras, en tempos de Julio Gurriarán. Cando este decidiu non continuar, ofreceulle facerse co liderado da agrupación, pero Núñez rexeitouno. «Se ti te vas, eu voume», asegura que lle dixo. E desde entón (1999) estivo nun segundo plano. Nunca se desvinculou do partido, pero si estivo afastado dalgunha das xuntas locais do PP. Ata que o pasado mes de xaneiro o partido púxolle a cargo dunha xestora. O obxectivo era, conta, volver reactivar a agrupación, que aínda seguía liderada por Moisés Blanco (candidato no 2015 e que renunciou a tomar posesión tras os malos resultados). «Levamos moito tempo falando e planificando», explica. E engade: «Non se trata de volver a empezar, non é cuestión de apartar a ninguén, senón de facer un partido máis unido», explica. Asegura ter xa perfilada a idea do seu proxecto, sobre o que el quere e o que necesita O Barco. «O primeiro era ter o candidato, que xa hai, e agora téñome que sentar coa xente do partido para diseñar a lista. Quero contar coa xente do PP, pero tamén con outra xente da vila, conectar coa sociedade», avanza. Asegura que non terá problema en integrar nela aos concelleiros que forman parte actualmente da corporación municipal. Pero avanza que haberá cambios. «Creo que hai que facer as cousas doutra maneira. Temos que aprender que non se estiveron facendo ben».
