Unha decena de repenicadores participaron nun certame que se celebrou despois da misa de domingo
21 jul 2025 . Actualizado á 05:00 h.As campañas da igrexa de Esgos soaron este domingo dunha forma moi especial. O encontro de repenicadores de campás congregou a unha decena de afeccionados a esta curiosa profesión, que cada vez ten menos seguidores. «Foi un espectáculo moi bonito; mereceu a pena só por escoitar o aplauso da xente», explicaba Manuel Rodríguez, un dos participantes neste primeiro certame, que fixo as delicias dos fregueses.
Manuel, de 80 anos, vive en Quins (Melón), e este domingo colleu o coche á primeira hora da mañá para viaxar ata este municipio. Toca as campás desde os 8 anos, pero a vida levou por outros camiños laborais ata que, hai uns meses, no seu pobo volveron chamar para encargarse dese xeito tan ancestral de alertar de tormenta, incendio, procesión festiva, funeral ou misa. Cada aviso é distinto, conta. «En caso de defunto, aquí tocamos catro veces cando é home e, se é muller, son tres; hai que saber estes pequenos secretos», conta sobre un traballo que lle segue ilusionando. «Oxalá houbese nenos que quixesen aprendelo, isto é moi bonito», asegura. Este domingo, por quendas, cada repenicador fixo a súa propia interpretación coas dúas campás que ten a igrexa de Esgos. Manuel prefire que sexan distintas porque o resultado ten máis matices, pero aínda así non dubidará en repetir, se hai ocasión.