A rápida actuación do chofer foi clave para limitar os danos, xa que separou a cabeza tractora do remolque
16 sep 2025 . Actualizado á 15:58 h.Un camión cargado de plásticos protagonizou un espectacular incendio este martes, cando se desprazaba pola autovía A-52. Aínda que non se produciron danos persoais, foi necesario mobilizar na zona aos servizos de extinción e cortar un carril da vía.
O suceso ocorreu pouco despois das dez e media da mañá, no quilómetro 247 da calzada, á altura de Cenlle. Un camión pertencente á empresa Transbagal transportaba restos de plástico a granel que comezaron a arder, por circunstancias que de momento se descoñecen.
A rápida actuación do condutor foi clave, xa que separou a cabeza tractora do remolque, o que facilitou que só se vise afectada polas chamas a parte traseira do vehículo de gran tonelaxe. Na intervención necesaria para sufocar o incendio participaron Bombeiros do Carballiño e traballadores do GES de Ribadavia.