O home, con domicilio en Ramirás, asegurou que non se decatou de que golpeara a unha persoa cando circulaba pola avenida de San Rosendo
30 nov 2023 . Actualizado á 16:17 h.A Garda Civil de Ourense localizou a última hora da tarde do mércores ao condutor que atropelou a unha muller en Celanova e despois deuse á fuga. O home, con domicilio en Ramirás, asegurou aos axentes que se persoaron no seu domicilio que non se decatara do sinistro, razón pola que seguiu o seu camiño. Os axentes realizáronlle as pertinentes probas de alcol e drogas, dando resultado negativo.
Os feitos sucederon ao redor das sete e media da tarde no número 7 da avenida de San Rosendo, cando a muller, de 63 anos, cruzaba por un paso de peóns. Testemuñas relataron aos axentes que o home conducía un Nissan Terrano de cor branca e que, tras o atropelo, abandonou o lugar. A ferida foi trasladada en ambulancia ao Complexo Hospitalario Universitario de Ourense (CHUO) con varias contusións, de carácter leve.
No momento do incidente chovía na vila de San Rosendo e a iluminación nese tramo da vía é escaso. Ademais, como ocorre en toda a avenida, a pintura dos pasos de peóns está borrosa. Dáse a casualidade de que a esa mesma hora, o pleno de Celanova debatía sobre a necesidade de poñer en marcha medidas para mellorar a seguridade viaria nesta travesía do municipio, debido á elevada cantidade de accidentes que se produciron o longo do ano. A maior parte dos sinistros foron nos pasos de peóns. O pleno aprobou incrementar as accións para evitar estes sinistros e solicitar á Xunta a cesión dese tramo da OU-531 ao seu paso pola vila.