Occo Art acolle o 29 de febreiro unha cita con catro dos caldos da adega O Pousadoiro, da DO Ribeiro, grazas ao proxecto «O perfume do viño»
23 feb 2024 . Actualizado ás 15:24 h.O proxecto «O perfume do viño» de Hosanna Pena e Ricardo de Arrúe aterra na galería Occo Art de Madrid , aliándose coa adega O Pousadoiro de Castrelo do Miño. Deste xeito achegarán estes viños da Denominación de Orixe Ribeiro ata a capital de España. Na sala de arte, a escasos pasos do Museo do Prado, celebrarase o próximo 29 de febreiro unha actividade en grao sumo especial. Trátase dunha iniciativa protagonizada polos caldos ourensáns. «O que facemos é harmonizar os aromas que suscitan as moléculas volátiles do viño coas obras de arte da galería desde un punto de vista filosófico», explica De Arrúe, que se define como investigador de aromas. Os expertos encargaron a un laboratorio francés as moléculas volátiles necesarias para recrear os aromas de cada un destes viños de Castrelo de Miño. «Polo tanto é un evento artístico, pero tamén científico. Unha oportunidade para entender as distintas variedades dunha forma nova e orixinal», engade. «O viño é xa en si perfume. Ten unhas notas que conforman o seu aroma, que poderían ser elementos de calquera fragrancia, só hai que buscalas», di Carmen Bescós, propietaria da galería madrileña xunto, José Antonio Camacho. Os asistentes a a cita en Occo tratarán de descubrir esas notas dos viños en tiras olfativas impregnadas coas moléculas volátiles, ao mesmo tempo que os catan. «É un evento que acollemos de xeito periódico e sempre resulta moi interesante», conclúe Carmen.
A actividade arrincará ás 19.30 horas. É gratuíta e as prazas son limitadas, así que os interesados deberán escribir ao correo electrónico queridilla\
Os viños que se degustarán serán Pousadoiro 2022 e 2014, Norte e Sur e, un moi especial, Ámphora, que é un novo tinto que produce a adega do Ribeiro, elaborado precisamente nunha ánfora de barro chegada desde Villarobledo (Albacete). «Alí hai unha olería tinajera impresionante. Teñen unha técnica milenaria para elaborar as pezas. Conseguen unha porosidad concreta no barro que fai que a fermentación do viño sexa diferente, que coza a unha temperatura específica», explica o adegueiro de Castrelo de Miño.
Ámphora é un caldo que se fai coa colleita dunha soa viña que O Pousadoiro adquiriu recentemente no concello de Ribadavia. «É moi vella e ten moitas variedades de uva mesturadas: garnacha, sousón, brancellao, caíño... Por iso escollémola para facer este proceso diferente», explica. «Maceramos o mosto coa uvas conxeladas durante tres días e logo a fermentación levámola a cabo na ánfora de barro, que fai un efecto de crianza sobre leas», remata. O resultado é un viño con moita menos acidez e máis untuoso en boca.