Morre un traballador ao caer dun tellado en Carballeda de Valdeorras

Un traballador perdeu a vida esta tarde en Soutadoiro, no municipio ourensán de Carballeda de Valdeorras, ao caer desde un tellado. O home estaba a traballar na reparación da cuberta dunha vivenda unifamiliar cando se precipitou ao baleiro.

O accidente ocorreu pouco antes das 16.00 horas. Varios particulares alertaron ao 112 Galicia de que o operario se precipitara ao baleiro, e que o seu estado era moi grave. O servizo de emerxencias activou de inmediato un operativo no que participaron Urxencias Sanitarias de Galicia-061, a Garda Civil e o Grupo de Emerxencias Supramunicipal (GES) de Valdeorras.

Os servizos sanitarios mobilizaron un helicóptero medicalizado con base en Ourense, pero a pesar dos esforzos realizados, non foi posible salvar a vida do traballador.

A Garda Civil iniciou unha investigación para esclarecer as circunstancias do suceso. A alcaldesa, María del Carmen González, lamentaba o sucedido: «Que triste!». Non coñecía a identidade do falecido, pero si sabía que non era ningún veciño da localidade.

---

---

---