En novembro do 2014 abriron a primeira tenda e catro anos despois a de home
30 may 2025 . Actualizado á 05:00 h.O concello de Barbadás celebra este venres a Noite Moucha para pór en valor o papel do comercio local. Os trece establecementos participantes — Calzados Zocos, Donicela, Elma, Emy Nails, Gaia Contigo Herbolario, Idunna, A Cegoña, Librería A Valenzá, MVT Galicia, Novo Era Electrodomésticos, Ohana Baby&Deco, Twins e Twins Men— permanecerán abertos ata as once da noite e ofrecerán descontos especiais, mesas de doces, actividades e sorpresas para os veciños. Ademais, haberá animación de rúa e actuacións de baile e zancudos, entre outras. Cada negocio contará cunha decoración específica, para facilitar a identificación dos locais participantes.
As irmás Elena, Rosa María e María José Gómez (estas dúas últimas xemelgas) rexentan tres tendas na Valenzá. As dúas primeiras están a cargo de Twins (xemelgas, en inglés) e Twins Men. Ambas as tiñan experiencia na venda ao público tras traballar en varias empresas. Ao pechar unha delas non tiveron máis remedio que establecerse pola súa conta.
En novembro do 2014 abriron a primeira tenda e catro anos despois a de home. «Traballamos toda a vida con bixutería e complementos e cando abrimos Twins fomos aos poucos incorporando roupa, fomos arriscando. Chegou un momento no que necesitabamos máis espazo, un lugar para o almacén, e entón fixémonos con outro baixo no que introducimos a roupa de home», explica María José, a quen todos chaman Pepi. Tras once anos saben que acertaron. O logo que lles acompaña durante este tempo e que decora a tenda di moito delas: «Comprei toda a vida e non teño que porme».
«Gústanos moito o trato co cliente e creamos emprego. Costa moitísimo saír adiante, sobre todo despois da pandemia, e para os autónomos non é doado, necesitamos máis axudas. Cando empezamos na Valenzá había moito comercio, varias tendas de roupa. E agora só estamos nós. Iso dános pena», explica. E anima a todos os veciños dos barrios, de calquera, a apostar polos comercios que teñen preto. Para impedir que pechen as tendas de proximidade. «Non só se trata de vender. Vaise perdendo o trato cos veciños e a xente quere que lle aconsellemos», engade. A terceira irmá, Elena, é a propietaria de Elma Lenzaría. Ela decidiu porse pola súa conta e dedicarse ao mundo da roupa íntima. As tres completan a imaxe de calquera muller. Este venres participan na Noite Moucha de Barbadás, xunto a outros comercios. «Sacaremos colgadoiros con pezas a uns prezos que chamarán a atención», afirman. O máis importante para as irmás Gómez é animar aos veciños da Valenzá a saír á rúa e a apostar polos comercios que teñen ao lado das súas casas, para que siga sendo un lugar no que vivir e poder saudar todas as mañás aos seus veciños.