O Concello detectou un aumento dos casos de violencia de xénero
26 may 2024 . Actualizado á 05:00 h.O Concello de Barbadás celebrou a mesa de coordinación fronte á violencia de xénero, que se realiza cada seis meses, e deu a coñecer os datos do Centro de Información á Muller. Este servizo atendeu a 132 mulleres de toda a comarca desde abril do 2023 ata o mesmo mes deste ano. Supón un 30% máis con respecto ao mesmo período do ano anterior.
Á reunión asistiron o alcalde de Barbadás, Xosé Carlos Valcárcel; a concelleira de Igualdade, Elisabeth González; o concelleiro de Emerxencias, Daniel Rey; o persoal do CIM; traballadores dos servizos sociais e axentes da Policía Local e Guardia Civil. Desde o goberno tola, detectaron un aumento significativo de casos de violencia de xénero. As vítimas contan cun servizo de asesoramento social, psicolóxico e xurídico no Centro de Información á Muller. Ademais, o Concello leva a cabo diversas campañas e actividades de prevención. A mesa serviu ademais para compartir propostas.
Barbadás conta co servizo Atenpro, un dispositivo de protección de seguridade para as vítimas de violencia de xénero que está conectado a unha central de alarma as 24 horas do día. Na actualidade son 14 as usuarias e o CIM encárgase de realizar o seguimento.