Acúsano de tallar 15 carballos nunha parcela que non era súa na Teixeira
A TEIXEIRA
A Fiscalía de Ourense reclama o pago dunha multa por un delito de danos
03 oct 2026 . Actualizado á 05:00 h.Visto para sentenza quedou este xoves na sala de vistas da praza dúas da sección penal de Ourense o xuízo contra un home acusado de tallar sen autorización unha plantación de carballos no municipio da Teixeira. Os feitos ocorreron os días 8 e 9 de decembro do 2023. Segundo recolle o escrito da Fiscalía de Ourense, o acusado desprazouse ata unha leira situada no lugar de Sistín e «co propósito de menoscabar o patrimonio alleo», cortou 15 carballos da parcela, danando ademais un muro de cachotería perimetral.
Na vista a prexudicada ratificou que ao acudir á súa leira atopouse coas árbores derrubadas, asegurando que varios veciños dixéronlle ver ao acusado executando a talla. O acusado, pola súa banda, acolleuse ao seu dereito a non declarar.
O fiscal do caso encaixa o ocorrido nun delito de danos e solicita para o investigado o pago dunha multa que ascende a 2.700 euros. Ademais, en concepto de responsabilidade civil, reclámase que indemnice á denunciante coa cantidade de 2.420 euros, suma na que foron peritados oficialmente os danos derivados do incidente. Este importe engloba tanto o valor da madeira tallada como o custo total de reposición dos carballos, así como a reparación do muro e a restauración do terreo ao seu estado orixinal.