A demanda do programa de comida a domicilio para maiores dispárase en Ourense
OURENSE
Mentres non se concreta a ampliación de prazas están en lista de espera 26 persoas
24 abr 2026 . Actualizado á 05:00 h.O servizo de Xantar na Casa facilita comidas a domicilio a persoas maiores ou dependentes que corren risco de exclusión social. Trátase dun programa impulsado pola Xunta de Galicia ao que se poden adherir os concellos que o desexen. Na capital ourensá funciona desde setembro do ano 2024 e a demanda deste servizo disparouse. As 62 prazas dispoñibles na actualidade están cubertas e hai 26 persoas en lista de espera.
O Xantar na Casa é a solución alternativa que o goberno encabezado por Gonzalo Pérez Jácome atopou para os usuarios dun programa municipal moi similar, o coñecido como Comedor sobre Rodas que chegou a ter preto de 400 usuarios pero que, tras unha longa crise, botou o peche con tan só 58. O Concello de Ourense deixou de prestar ese servizo en marzo do ano 2024 e, tras uns meses de impás, asinou un convenio coa Xunta para adherirse ao citado Xantar na Casa. Moitos dos antigos beneficiarios xa buscaran outras alternativas e a demanda tardou en cubrir as prazas dispoñibles.
Con todo, hai xa meses que ese límite de 62 usuarios acadouse e, segundo os datos facilitados polo goberno municipal nas xuntas de área desta semana, actualmente hai 26 persoas en lista de espera. En setembro do 2025, cando a posta en marcha do programa Xantar na Casa acababa de cumprir un ano, xa había nove solicitantes agardando a súa quenda para recibir a prestación e o PSOE levou a pleno unha proposta para pedir á Xunta unha ampliación de prazas ata chegar ás cen en total.
Efectivamente, o Concello de Ourense iniciou os trámites para iso, pero estes se demoraron no tempo, o que provocou as reiteradas protestas da oposición. Un dos problemas foi que, antes de nada, a Xunta esixía ao Concello o abono das débedas que este tiña coa Administración autonómica en materia de servizos sociais. O Concello xa cumpriu coas súas obrigacións económicas e a addenda ao convenio xa está asinada, polo que tan só quedaría que o pleno aprobe un reaxuste nas partidas para financiar a parte que lle corresponde ao Concello ourensán.
O servizo do Xantar na Casa é moi valorado entre os usuarios que xa gozan del. O sogro de Marcos —que xa era beneficiario do programa municipal de Comedor sobre Rodas— di estar satisfeito. Explica que tivo algún problema cos horarios de entrega, que practicamente o «obrigaban» a non saír de casa, pero xa está solucionado. «Coa comida non ten queixa, Aínda que houbo unha lixeira suba este ano, co que paga está contento co servizo», engade.
Consello Municipal
Esta semana o Concello de Ourense constituíu o Consello Municipal de Servizos Sociais, no que están representados os grupos políticos da corporación e entidades de todo tipo relacionadas con ese ámbito. O PSOE levou unha batería de propostas estruturada en catro grandes eixos de actuación, a atención aos dereitos básicos e a resposta inmediata; os coidados, a conciliación e a igualdade; o benestar, a saúde mental e a comunidade; e a innovación social.
«Ourense non se pode permitir seguir chegando tarde aos problemas sociais», din os socialistas, que reclaman un cambio de enfoque para abordar esta problemática. «O que propoñemos é claro, menos burocracia e máis solucións. Porque a política social non pode ser un trámite, ten que ser unha resposta real», apuntan desde o PSOE.